外來語
荷里活「情場鬼見愁」里安納度，上周二（4日）跟女友Blake Lively齊齊發聲明宣布分手。由撻着到斷正，兩人只係拍拖短短5個月，快過我攞6千蚊！
不過有名你叫「情場鬼見愁」，失戀啫，使乜驚！唔夠一日，里安已心情平伏，仲同埋阿媽、老死一齊去動物園撚蛇。
無痛失戀，原來就係咁囉。
5月開始拍拖，10月分手。短短5個月，里安、阿Blake由法國玩到意大利，由加州玩到紐約，新婚夫婦都冇佢哋蜜月咁多。初時以為佢哋修成正果，點知遊咗半個地球，居然得個桔，真係撞鬼！
成家立室的疑惑
查實分手咪仲好！好似里安咁，36歲仍未定性，女友一日到黑氹氹轉。阿Blake亦唔好得去邊，24 歲女事業如日中天，忙拍《花邊教主》、忙拍電影，周身唔得閒。所以兩人由爆出戀情開始，一早不被外界睇好。不過有網友唔信邪，姣婆遇着脂粉客，或者會有奇蹟呢。結果？咪奇蹟咁快game over囉。
事實上，分手真相仍然係一個謎。據知情人士透露，Blake有感戀情發展太過神速，唔想咁快定落嚟；加上里安想成家立室，阿Blake 迫於無奈惟有揮劍斬情絲。
全面復活
熟悉里安納度嘅讀者聽到呢度，係咪想「咭」一聲笑出嚟呢？我都係。
係人都知里安出名花弗，拍拖以來，只有佢撇人冇人撇佢，以往嘅女朋友企圖跟佢拉埋天窗，都慘被一一回絕，搞到分手收場。雖然阿Blake後生又靚女，但里安點會輕易動「凡心」吖？
你呢頭分手佢嗰頭就復活。喺發聲明之後一日（5日），里安已經如常生活。當日佢帶埋阿媽，夾埋過氣「蜘蛛仔」杜比麥佳亞（Tobey Maguire）一家人，乘搭私人飛機由悉尼飛至黃金海岸參觀一個動物園。里安仲童心未泯，將條大蟒蛇掛喺頸上。不過咁都未算，據講里安喺澳洲拍攝《大亨小傳》時，已密密約會當地新紮嫩模。聽聞唔止一個，仲係兩個。講到呢度，邊個撇人邊個被撇，心照啦。
舊愛一樣精彩
新歡陸續登場
有指9月份里安拍攝新戲時，經常喺酒店房密會澳洲嫩模。你做初一我都做十五。有消息指，阿Blake早前被目擊同「綠燈俠」賴恩雷諾士伊挹。各自有新歡，咁咪各自happy囉。
嫩模1號 Alyce Crawford
Alyce是《澳洲超級模特兒新秀大賽》出身，芳齡21歲。據知佢跟里安係經朋友介紹而認識。
嫩模2號 Kendal Schuler
里安於夜場邂逅Kendal。咪睇Kendal個樣咁成熟，查實佢得20歲。里安真係愈食愈嫩。
綠燈俠賴恩雷諾士
賴恩係近排當紅小生之一，佢同性感尤物史嘉莉祖漢遜（左）離婚後，有傳同影後珊迪娜布洛（右）撻着，桃花甚旺。 ####
上周三（5日），里安跟成班friend到黃金海岸嘅Australia Zoo參觀。該動物園由已故「鱷魚先生」Steve Irwin創立，里安更細意享受園內「設施」，將條蛇擺喺肩上。
後來里安仲同「鱷魚先生」囡囡Bindy傾偈，失戀後逢女必撩、老嫩通殺咁話。
傾完偈，佢執咗隻不知名嘅動物，仲攬到實係咁摸，成個大細路咁。
我單身，女性讀者就最開心！（設計對白）
5月中，阿Blake被目睹跟里安喺船上卿卿我我，因而傳出緋聞。及後兩人多次被目擊把臂同遊，戀情漸漸公開。可惜拍拖唔夠半年，兩人已分手。此情此景成追憶咯。
分手後，阿Blake亦唔輸蝕，出發去百貨公司大出血。聽聞佢買鞋買袋收穫豐富。
佢之後仲出席咗一個萬聖節活動，蓮子蓉咁嘅笑面，5個月戀情玩完，so what?
阿Blake上年跟賴恩合拍《綠燈俠》時，一早已傳過緋聞。今次翻撻，一啲都唔出奇。
846期
