媽咪姐手帳
Neway「大新抱」陳法拉，老公薛世恒有成間唱片公司Neway唔簽，反而加盟另一間唱片公司「星煥」，佢成日同媽咪姐吹水話會出碟，之但係吹咗年幾都冇聲氣。
唱片公司最近終於落實幫佢搞唱片，點解？聽講係法拉老公薛世恒出手。二五話薛少見老婆隻碟遲遲未出，睇唔過眼，暗中「資助」俾「星煥」，要佢哋拿拿臨同法拉籌備出碟。
不過法拉亦好識做，每逢節日都會派利是俾「星煥」員工，就連早排重陽節，有員工拜山，佢都俾咗幾嚿水對方，話俾佢買花同燒肉孝敬先人喎。法拉兩公婆內外夾攻，公司上下梗係仆心仆命同法拉做碟啦！ ####
陳法拉出碟，一直只聞樓梯響，未見有動靜。被「星煥」冷落咁耐，最近終於由老公出手，出碟有望。
左起：吳若希 鄭欣宜 何哲圖 關心妍 陳法拉
據講「星煥」為咗主力捧許廷鏗同欣宜，所以將法拉出碟一事揼埋一邊，點知一揼就年幾，難怪法拉冇癮。
話時話，法拉喺香港似乎甚少見到佢開腔，但早幾日去馬來西亞雲頂做宣傳，同謝天華合唱後，觀眾反應唔錯。
老婆，有我撐你，定啲嚟！（設計對白）
846期
