揞名爆
「名女人」自從俾闊佬「樑哥」撇甩後，已甚少出現名人場合。不過唔好以為佢修心養性喎，有口痕友爆料俾媽咪姐聽，話「名女人」最近啱啱搭上個已婚男，不過呢個男人唔係有錢佬，亦唔係乜嘢才俊，只係普通打工仔一名咋。最好笑係佢哋撻着頭搭尾都係兩、三個月貨仔，「名女人」竟然話出錢俾個男人，要人哋同老婆離婚喎。
咦，「名女人」冇咗「樑哥」，就算再搵，都應該搵件有米㗎，冇理由貼錢養仔噃？
口痕友嗤之以鼻話：「佢只不過呢段時間係空窗期，寂寞難耐，求其冇狗拉隻貓填住個氹啫。聽講佢近排頻頻返祖國，掛名做生意，實則就係上去搵老細。」咁又係，「名女人」擺明係「拜金女王」，點會吼個打工仔吖。
####
插圖：Wendy
846期
