媽咪姐手帳
要數電視圈中小富婆，媽咪姐認為，蔡少芬（Ada）一定榜上有名。向來精打細算又唔大使嘅Ada，最大花費係買樓。今年初囡囡張楚兒未出世，佢就以七百萬買咗元朗錦繡花園獨立屋，俾依家半歲嘅楚兒有足夠活動空間。
早幾日，媽咪姐撞到Ada同一個少女親友及賓賓，帶住小楚兒去鴨脷洲海怡工貿中心買平玩具，呢個工廠大廈專做名牌貨outlet，由服裝、傢俬、童裝、影音一應俱全，比市價平兩、三成以上，係濕平勝地。
當日Ada買咗唔少玩具，塞滿曬成個車尾箱。返到屋企門口，愛女心切嘅Ada第一時間親自抱小楚兒入屋，戰利品就由賓賓負責拎入屋。 ####
返到屋企，Ada拿拿臨抱楚兒入屋。
近日秋風起，Ada依然着住露背吊帶裙，但又披條大頸巾同戴cap帽。睇落佢嘅衣着組合都好獨特。
Ada買到唔停手，有學行車、又有搖搖椅，塞到車尾箱滿曬。
Ada買嘢真係唔手軟，此行收穫甚豐，要出動兩個賓賓幫手拎，真係誇張。
846期
