揞名爆
「雙木」最近自爆同「小氣皇」唔妥，不過，媽咪姐聽同佢哋有份出外地拍旅遊特輯嘅員工講，話「雙木」已有所保留，因為有啲嘢怕講出嚟，會令「小氣皇」更加唔高興喎。
話說有次佢哋去咗一個海鮮場拍攝，影完相，做完訪問，對方老闆預備咗海鮮餐慰勞攝製組。正當人人食得興高采烈之際，突然傳出鈴鈴喳喳聲，仲聽到有人唸經。「雙木」以為有咩祭典，就同幾個兄弟去睇吓，竟然見到「小氣皇」對住條魚又跪又拜，個口仲唸唸有詞，話要將條魚放生。本來咁都算，最大問題係「小氣皇」竟然當眾話個老闆咁樣殺生法，罪孽深重，搞到海鮮場老闆尷尬到暈。「雙木」見情勢不妙，拿拿臨打電話返公司報告。之後公司即時飛走「小氣皇」，仲要佢立刻返香港。
哈，咁講法，「雙木」都算好人，冇踩多腳。咁又係，話曬同「道」中人，留番啲餘地係啱嘅。 ####
插圖：映廷
846期
