娛一叮
近日電視圈掀起挖角潮，無綫出現小生、花旦荒。「亞洲視帝」林保怡年中約滿TVB後拒續約、鎮台花旦佘詩曼亦選擇離巢北上賺人仔，加上王維基為旗下的電視牌照戮力造勢，無綫亦不敢怠慢，拿拿臨開拍經典劇《金枝慾孽2》力挽聲勢。
周一（10日）《金枝2》拍巡禮短片，林保怡同阿佘已知唔玩，但上集飾演「安茜」一角的張可頤竟然都無影，反而未落實會接拍的蔡少芬卻高調現身。據知張可頤曾於10月4日為《金枝2》試造型，本刊直擊她等化妝等到發爛渣，走出化妝間即打電話向高層告狀：「點解冇人幫我化妝！」未開拍已經咁惡搞，難怪她最終被飛出局。
由黎耀祥及張可頤擔正的台慶劇《法證先鋒III》於周一（10日）啟播，收視最高35點，黎耀祥亦坦言爭視帝的信心由半成增加到八成。不過女主角張可頤似乎無咁好命，除了被網友狂彈狀態唔好，個樣又老又殘外，就連經典劇《金枝慾孽》開續集亦被飛。
向高層投訴
周一（10日）晚，陳豪、鄧萃雯和蔡少芬高調現身無綫將軍澳電視城化妝間，接受完訪問再入廠為《金枝2》拍巡禮短片。本刊得悉，其實張可頤早前已為此劇試造型，可惜因她扮一姐告狀而激嬲高層。
試造型是在上周二（4日），當天張可頤在無綫15廠化妝間現身。記者見她在內坐了15分鐘，與化妝阿姐傾唔夠兩句，就氣沖沖走出化妝間外面的空地打電話。記者聽到她在電話中非常勞氣說：「一個同緊陳敏之化妝，一個搞緊祥仔（黎耀祥），一個就鍾嘉欣，點解冇人幫我化？我唔係想投訴，我呻吓啫！其實我過4廠都OK㗎！」講電話期間，張可頤發現記者，即急步行開，但改用短訊繼續發牢騷，看來對方應該是無綫高層。
據知，張可頤當日一入化妝間，即老實不客氣叫化妝師幫佢即刻化妝，但幾位化妝師都有工作在身，未能即時服侍佢。知情者透露：「張可頤一入嚟就話要幾點入廠，當時化妝間內嘅演員全部都要入廠㗎啦！佢試《金枝慾孽2》造型之嘛，其他人係正式有嘢拍㗎！化妝師話未有人住，佢就走去向高層投訴嘞！真係當正自己係一姐。」
戚其義怕咗張可頤
無綫正鬧花旦荒，監製戚其義明知04年拍《金枝》時張可頤與其他演員已鬧不和，今次為了加強《金枝2》的卡士都要局住用她，但張可頤未拍已投訴多多，戚其義最終亦改變主意。「無綫依家剩番幾多一線演員大家心中有數，阿戚一直想用原班人馬，但黎姿同阿佘都唔拍，惟有留住雯女（鄧萃雯）同Maggie（張可頤）啦！以前Maggie成日扮阿姐得罪同劇演員，阿戚都知佢難相處，不過事隔咁多年諗住佢會改變，咪即管搵佢埋班。點知試造型已經搞單咁嘅嘢，仲投訴到去高層嗰度，阿戚都怕咗佢，寧願搵第二個頂上。」據知鄧萃雯已落實演出，而戚其義正努力遊說蔡少芬，至於張可頤的戲份已被抽起。記者曾致電戚其義，惟截稿前都未獲回覆。
繼續阿姐上身
06年拍畢電影《長恨歌》，張可頤因患上甲狀腺炎而宣布全面退出，08年她重返娘家，先接簡單的主持工作，如《更上一層樓》、《大凶兆》和《香港先生選舉》等，09年才開始接拍劇集，去年更成功執佘詩曼二攤，在《法證III》飾演第一女主角Dr. Chung。
曾在03年以《九五至尊》獲「本年度我最喜愛的電視女主角」和「我最喜愛的電視角色」的張可頤，今次在《法證III》飾演Dr. Chung卻被網友狂插，不但彈她又老又殘，更說她不夠專業。網友又指為何劇中演員開會竟然一人有一部平板電腦時，張可頤即阿姐上身，在微博反擊說：「用平板工作為甚麼竟然會產生這麼大反應呢？莫名其妙的，這工具跟手提電腦有甚麼分別？這是現今全世界最普遍的事，難道大家仍停留在石器時代？」
她在新劇的演出被網友踩完又踩，看來很難再攞視後。知情者透露：「雖然《法證III》係台慶劇，不過張可頤攞視後機會好微囉！因為內部開咁多次會都冇高層提過佢個名。佢得罪人多，又難服侍，好多監製都怕咗佢啦！」復出只有三年的張可頤，返娘家拍劇其實收入有限，但近年她在樓宇買賣方面都有斬獲，身家估計過億，加上有個做基金買賣的男友，難怪張可頤一副唔憂米嘅態度。
冇份拍巡禮片
《法證 Ⅲ》輸口碑
《法證III》周一（10日）首播最高收視雖然達35點，但收視高並唔代表口碑一定好，網友已紛紛在網上發表意見，彈多過讚！
網友主要狂插張可頤同黎耀祥唔夠專業，又話睇到祥仔好似睇緊《畢打自己人》一樣，普遍覺得《法證II》比較好睇，更有人話演員班底換曬，因為冇咗歐陽震華、佘詩曼和林文龍而罷睇。
除了批評劇中演員，亦有網友批評張可頤太神出鬼沒、神機妙算，而且劇情多次出現高科技產品，專用名詞也太複雜，觀眾未必睇得明。劇中用了大量平板電腦，似有賣廣告之嫌。
####
9/10 Madam上身
本周日張可頤到ICC出席《法證Ⅲ》宣傳活動。即使未上台，只在停車場，她依然擺出一副Madam款。
4/10 黑面發牢騷
戴黑超酷爆的張可頤得知化妝間冇人得閒幫她化妝時，即行出15廠外致電告狀，其間更大大聲話：「你唔得閒一件事，但好聲氣啲都得啩。」
告狀期間發現記者，張可頤即收線行開，企埋一邊改send短訊告狀。
04年有份演出《金枝》的張可頤（右一），曾因扮阿姐教人做戲而引起各演員不滿。圖片
面腫腫宣傳
06年曾患甲狀腺炎的張可頤，病癒後依然不時面腫。周一（10日）她出席新城宣傳活動時，面和下巴亦明顯水腫。
網友彈
做完宣傳咁啱午飯時間，一眾演員拉大隊到附近酒樓醫肚，途中只有張可頤四圍，相當冇安全感。
旁邊坐住徐子珊和胡定欣，張可頤皇後般坐正中間，唔知有冇萬歲呢？
周一（10日）蔡少芬在化妝間同工作人員有講有笑，難怪一埋位即有兩名化妝師招呼。
化好妝的蔡少芬笑臉迎人，陳豪亦好有默契咁配合。
雖然未定角色戲份，不過鄧萃雯已答應監製戚其義，會在《金枝2》擔演一角。
自動波企中間
當日除了主角黎耀祥，同劇演員都到齊宣傳，第一女主角的張可頤自動波企正中間，搶唔到好位的徐子珊就嘴扁扁雙手插袋。
劇中有大量平板電腦，又介紹有部名為「IBIS」的儀器只需放入彈頭就搵得番邊支槍射出，普通市民確係會睇到一頭霧水。
第一集講到出場冇耐嘅張可頤竟然離遠都睇到藥樽上紙仔嘅字，又係神機妙算咗啲嘅！
846期
