媽咪姐手帳
Angelababy早前同台灣大隻仔彭於晏拍《夏日樂悠悠》傳緋聞，有指佢為黐新仔同黃曉明分手。不過早幾日先有網友喺內地機場見到Baby同黃曉明一齊，分手傳聞不攻自破！
星期日（9日），Baby返港為新戲宣傳，活動後即去圓方行街。話就話行街，實則漫無目的周圍行就真。當日Baby去完唱片店再去電器舖混吉，邊行仲要邊睇短訊，根本就冇集中精神shopping。
一個女人喪失shopping意欲，已經夠奇怪。不過奇處未算奇，媽咪姐眼見Baby一個人手持3部電話，一部公事、一部私事、最後一部就梗係留俾「海綿蛋糕」專用啦。睇嚟Baby戇居居隨時on phone，應該係等緊曉明calling。 ####
Baby一邊遊魂一邊㩒電話，完全不在shopping mode。
化行妝戴曬黑超，Baby去到邊都咁引人注意，行唱片店齋睇唔買，都只為打發時間。
Baby一個女仔揸住3部手機，真係誇張，其中兩部係iPhone。依家啲搶電話賊咁猖狂，Baby小心啲！
846期
