諗縮數
慳老臨 劉華 Sammi 企街失控
2012年09月06日停工超過一年的杜琪峯新片《盲探》最近再度復工，劇組於上週連續四日在旺角鬧市拍外景，揀正夜晚七點至十一點，人潮至盛時間開工，有路人做埋茄喱啡，慳番唔少！辛苦兩男女主角，要變成海洋公園的盈盈樂樂。
劉德華、 Sammi日日戙喺條街埋位，整條西洋菜街幾乎陷入癱瘓，寸步難行。簡單拍一個 shot，都要用上粒幾鐘，搞到導演成日發火爆粗。
慳到老臨時，卻拖長開工時間，得不償失。
發火爆粗
威過特首出巡，沿路數百市民跟住不斷叫囂，相當壯觀。由於現場太混亂，最後兩位演員只可以拍單獨戲分，以免兩個人一齊蒲頭，情況更難控制。
劇情講述 Sammi匆匆忙忙跑到小食店買完外賣後，抽住一袋二袋過馬路；另一邊飾演盲探的劉華，揸住盲公竹行行企企；兩個簡單鏡頭，一拍四粒幾鐘。其間沿途街坊完全唔理工作人員勸諭，企定定睇明星，拍攝受阻，杜 sir唯有投降，提早嗌收工。
第二晚，劇組嘗試拍攝二人同場戲分，拎住大袋外賣的 Sammi在人群中跑過，劉華則緊隨尾後；劇組亦早有部署，叫定保母車 standby，拍完一個 shot，二人第一時間跳上車再開走到後面街暫避。
但一 roll機，沿途街坊不停用閃光燈影相，又狂叫劉華 Sammi，杜 sir即時嚟料：「你哋阻×住人哋搵食呀！」
就算杜導再大火，也於事無補。
歎慢板
「揀喺嗰段時間（晚上七至十一時）拍，係想趁啲鋪頭未收，條街又多人，請少啲臨記都一樣夠熱鬧，而家請一個臨時演員要三百幾蚊，計落可以慳好多！冇諗過啲人會咁失控，有啲人仲衝埋嚟入曬鏡，穿曬崩。嗰日拍啲嘢全部都唔用得，要擇日搵第二個地方再補拍。」劇組工作人員說。
拍戲「歎慢板」嘅杜琪峯，繼拍足三年的《奪命金》後，今次《盲探》亦停工超過一年。
「套戲上年已經開始拍，拍咗幾個月就停，前後拖咗成年， Sammi同華仔為咗連戲，兩個都唔敢轉髮型。」
週一（三日），趁住劉華飛倫敦出席殘奧運動會之前，劇組舉行開鏡拜神儀式，已連踩一個星期的劉華、 Sammi都顯得一面疲態。
「旺角街景之後，華仔同 Sammi兩邊都有詐型，話冇諗過咁混亂，最唔抵係拍得咁辛苦，但啲 shot用唔到。」
冇失手
劉華、 Sammi、杜琪峯被稱為「影壇鐵三角」，由 00年《孤男寡女》開始，合作過三部電影，從未失過手，套套叫好又叫座。
00年《孤男寡女》
票房： 3533萬
三人第一次合作都市愛情喜劇，成為當年最賣座的華語片，更令 Sammi初次獲提名金像獎及金馬獎的最佳女主角，自此， Sammi一直稱杜 Sir為恩師。
01年《瘦身男女》
票房： 4040萬
Sammi與劉華在戲中飾演 200磅及 300磅肥妹肥仔，狂收超過 4000萬，二人亦分別提名金像獎最佳男女主角， Sammi憑住歌曲《終身美麗》，獲得最佳原創歌曲獎。
04年《龍鳳鬥》
票房： 1547萬
第三度合作，杜琪峯更揚言短期內三人不會再合作拍攝愛情片。劇情講述 Sammi及劉華飾演一對賊夫婦，劉華得知自己患絕症，為了隱瞞妻子，借意提出離婚，臨死前更將所有全部送贈 Sammi，電影票房不及前兩部，但口碑不俗。
.[壹週刊]慳老臨 劉華 Sammi 企街失控
http://hk8news-d.blogspot.com/2012/09/sammi.html
