2012年9月6日 星期四

[壹週刊]劉家輝站起來 親證妻兒謀產




探熱針

劉家輝站起來 親證妻兒謀產

2012年09月06日

中風一年的劉家輝(原名冼錦熙),為擺脫 09年雙方已簽下離婚書的第二任泰籍妻子,聯同一對仔女日夜施壓要他交出財產,與及月索五千元家用,連傷殘津貼都要奉上的困擾,於是向胞姊及友人求救,離開位於太子暫租療養的單位,轉住護老院靜心休養。

謀產風暴爆出後,劉妻及二十歲兒子冼峻龍在泰國越洋反擊,推翻指控的同時,還稱有人從中作梗,令一對仔女欲見父親不果。家醜不出外傳,但不屑妻兒講大話的劉家輝,經過兩個月積極治療,終於站起來,還親證要保護僅有的財產,拒見子女。

狀態好可行二百步

病後沒有家人真正關心,還要見到向錢看的妻兒在狡辯,在護老院重拾生存鬥志的劉家輝,絕地翻身,激發他積極接受康復治療。除了做物理冶療,還進行穴位針灸按摩,兩個月下來,原本半身不遂的他,近日終於可以站起來;並親自交代家事,向以為他沒有康復機會的妻兒「示威」。

上週二(八月二十八日),在接受物理治療的劉家輝,為向記者展示他的康復進度,即席示範唔坐輪椅。只見他左手撐住枴杖,在友人輕扶下,右腳能提起走路數十步。劉家輝稱狀態好的話,試過行到二百步。

脫離妻兒魔掌後,不單康復進度良好,精神亦不俗;雖然中風後一度口齒不清,但經過數月的鍛鍊,目前已能連貫地說出兩三個字,故他決定站出來,反擊妻兒的言論。

壹:唔想見啲仔女,係咪你嘅 意願?

劉:(大力點頭)係呀!

壹:你委託咗律師同經理人 Eva,處理你現時嘅生活事務?

劉:(繼續點頭!)無錯!

壹:點解你要尋求法律保護?係咪妻兒要攞你嘢?

劉:(瞪大雙眼),係呀,好多嘢!(壹:財產?)係呀!(壹:保護埋你安全?)係呀係呀!

壹:依家仔女都唔可以攞你啲財產?

劉:梗係!

壹:你中風之後,仲要俾家用供養仔女。你無曬工作能力,係咪一直期待已經二十歲嘅大仔養番你?

劉:(低下頭嘆了一口氣,語帶無奈。)係!

放大圖片

中風後右邊半身不遂的他,積極接受治療,近月終於行得番!由房間行出走廊,幾十步難不倒他。

放大圖片

劉家輝上週六接受本刊訪問,親證他不想接見妻兒,免得影響情緒,阻礙康復。

放大圖片

劉家輝 92年以一百萬買入的堅道唐樓,現升值至 750萬。他病重後該物業即成劉妻及子女日夜逼他轉名交出的財產。

放大圖片

廿歲兒子冼錦熙及十七歲幼女冼詠珊,不知父親親證拒見,故上週六硬闖護老院見父不果後,聲稱其父遭人擺佈。

驚恐被放逐到泰國

有傳劉妻曾計劃將中風的劉家輝放逐去泰國,但劉妻事後否認,並強調送他去泰國只為幫他醫病及方便照顧。記者問劉家輝是否願意被家人送去泰國,他的反應好大,一臉恐懼並不斷搖頭的說:唔去,唔去!

其子冼峻龍對外聲稱父親中風後頭腦唔清晰,認為遭父拒見是受人擺布。但記者當日所見,劉家輝有紋有路,對於公開家醜亦點到即止,就算記者追問下去,精靈的劉家輝堅持封口,再沒回答。

劉家輝之所以站出來,全因他不甘被劉妻逼迫,精神受盡折磨。

「今年三月,劉家輝仲住喺太子,佢老婆同仔女,日日叫佢將啲財產過曬俾佢哋。佢都未兩腳一伸,仲有機會好番,都想留番啲錢做生活費,點解咁快要佢分呢?佢哋甚至幾個星期都無帶劉家輝返醫院覆診,究竟係咩企圖?劉家輝想睇醫生,因為佢想好番。雖然半身不遂,但頭腦好清醒,見家人逼佢攞錢,佢就扮懵應付,希望拖得一日得一日,等人救!最後佢家姐由美國返嚟,同埋佢啲朋友救咗佢走!」知情者說。

去年 10月落寞

去年中風兩個月後,在九龍醫院療養的劉家輝,因接受不了自己不良於行而一臉愁容。

今日精神奕奕

撇開家事,劉家輝便回復笑容,表情多多,面容比去年飽滿,回復昔日一點劉家輝風采。

硬闖見父不果

放大圖片

親人無情,但人間有情。除曾志偉,黎瑞恩亦出手相助劉家輝,安排一位義工按摩師,為他按摩通淋巴,助他加速康復。

「逃離」妻兒監視後,劉家輝在護老院靜養待康復。上週六(九月一日),二十歲兒子冼峻龍及十七歲幼女冼詠珊,得悉父親接受訪問,即 call齊人馬,聯同另一報館記者硬闖護老院要求見父。但因劉家輝早己透過律師立下一張探親名單,寫明劉妻及仔女均不獲接見,護老院負責人公事公辦,阻截一對子女上房。

據了解,上月冼峻龍亦曾到過護老院,並以攞家用為理由要求與父親對話。「佢一嚟到,就話冼錦熙係佢阿爸,仲話阿爸嘅傷殘金太少,屋企人唔夠使,佢嚟要問佢攞家用,所以一定要俾佢見劉師父。」一名院友爆。

硬功不果,今次攞住手機,聽住電話中另一方教路的冼峻龍改施軟功,他在護老院大堂說:「我想見嚇我阿爸!」

擾攘期間,院長現身調停:「若果你係孝順,點解你唔先問阿爸喺度住得好唔好,食得慣唔慣。不如等你阿爸再軟化啲,先睇嚇佢想唔想見。我建議你依家寫張慰問咭俾阿爸,我哋幫你交俾佢。」

礙於冼峻龍帶同傳媒到場,院方最終決定報警。警員到場後,了解過院方提供劉家輝一張拒見人物名單後,對他說:「你阿爸寫咗唔見,你唔可以咁衝動!」冼峻龍於是向警員道歉:「我都知自己太魯莽!」

曾志偉早前探望過劉家輝,並送他 iPad,劉家輝珍而重之,在護老院經常上網解悶。

上月廿二日劉家輝 60歲大壽,雖然子女不在旁,但他的外甥女(左圖右一)和其他親友齊來為他慶祝。樊奕敏更訂了一個結他蛋糕送給他,令劉家輝好開心。

廿多針

每星期劉家輝到中醫師麥超常診所做針灸,其間麥醫師透露,劉家輝出事後一直接受針灸,且進展良好,但到今年四月劉家輝突然停止找他。「直至佢入咗護老院,我先見番輝哥。見番佢時隻右腳因停止針灸而萎縮緊,如果唔係中間停咗,佢好得仲快。」因回復知覺,故由頭到落要落廿幾針的劉家輝強忍痛楚。

搵外人做委託人

放大圖片

劉的一對仔女因帶埋傳媒殺入護老院求見父,結果驚動警方到場勸諭離開。

冼峻龍偕妹離開護老院後對本刊記者說:「經理人 Eva做咗阿爸保證人(正確名為委託人),每次我搵阿爸,佢就收我線。我覺得阿爸唔見我哋,係有人喺背後搞事。(點解係 Eva做委託人,而唔係你哋家人?)係阿爸指明要佢做!(咁即係你阿爸同意佢做,唔俾你哋做?)唔……」

見兄長講多錯多,細妹冼詠珊拍拍他的背脊,示意收口。記者追問其母是否仍在泰國,冼峻龍答是;記者問他為何交由兩兄妹面對此事,冼詠珊拉住哥哥就走。

身體未完全康復,已屆六十的劉家輝要面對家人困擾,實在百上加斤。

清醒入住

劉家輝入住的嗇色園護老院屬政府資助,除一個護士只負責照顧三個院友,人手充足外,亦提供醫療、營養師駐守及輔導等多項服務,駐院社工每月兩次定期會見院友家人跟進情況。由於設備完善,申請人數頗多,輪候時間約五年。劉家輝雖屬緊急安排,但亦要符合院方基本條件,入院人士須頭腦清晰,除要直屬親人簽名作證,更要有醫生正式認可作實。所以劉家輝分居妻子以及兒女指有人從中作梗,擺布他入住護老院,實在無可能。



.[壹週刊]劉家輝站起來 親證妻兒謀產
http://hk8news-d.blogspot.com/2012/09/blog-post_3292.html