同你吟一吟
呢排無綫俾王維基搞到七國咁亂，挖角潮最得益都係班綠葉演員，以前低薪爛做冇人理，加陣瘦田有人爭，地位都唔同曬。上個禮拜三（十月五日），台慶劇《法證先鋒 III》舉行記者會，無綫特別安排綠葉列陣，一字排開打頭陣出場，尤其係早排鬧無綫係埃塞俄比亞難民營嘅李國麟，除獲高層親自接見講數，當日更企正中間靚位做綠葉一哥，果然有「非士」。
甘草綠葉終於受到尊重，想當年都係三打七嘅黎耀祥最有共鳴，今日貴為一線小生，又係冧莊視帝，問佢有冇信心今屆可以連中三元，祥仔講得坦白：「套劇五月先煞科，都冇諗住變台慶劇，本來對視帝冇咩期望，但家陣就多咗五倍信心。」你咪話，八珍都有咁嘅感覺，今年視帝，唔係林峯、謝天華嘅念力大增。 ####
平均年齡60綠葉齊升呢，打頭陣出場介紹台慶劇，最敢言嘅李國麟企中間，冇佢同王維基，大家都冇今日。
其實吳卓羲仲有一位疑似緋聞情人馬賽，當日兩個完全冇埋身，馬賽出場更忘記戴黑超，失魂！
劇中另一對緋聞情侶仲有徐子珊同吳卓羲，最近男方嘅國產女友張韾予逐步明朗化，徐子珊亦被傳同髮型師有戀情，吹水！
拍劇期間，陳茵媺同蕭正南傳緋聞，家陣女方已經名花有主，避忌啲好正常。
曾經都係小生花旦身邊綠葉嘅黎耀祥，今日已經係兩屆視帝，師奶劇迷偶像，佢仲話有信心今屆連中三元，擺明唔怕大熱嘅鄭嘉穎同謝天華。
1127期
