講起大陸樓，依家內地男士要娶老婆，首要條件係有房子，內地樓價隨手過百萬，即係話國內男士冇一百萬都唔使搵老婆。之但係喺世界另一角落，只需要千六蚊港紙，就可以娶老婆。男士聽到梗係問，究竟喺邊度？答案就係非洲肯雅。
一言早前跟位上市公司高層朋友飯局，佢剛從肯雅返嚟，除咗去睇獅子大象，仲了解咗一啲當地民風。肯雅係一個好窮地方，導遊同佢講，買隻牛大約係一百蚊美元，只要買兩隻牛，就可以娶個老婆返屋企。換言之花千六蚊港紙，男士就可成家立室，怪不得啲男團友一聽，即刻吹口哨歡呼。
姑勿論個導遊有冇誇張，但以肯雅生活水平咁低，娶老婆嘅使費開支高極有限。但千萬唔好睇小肯雅，因為美國總統奧巴馬嘅老爸，都係肯雅人。
