社交圈
雖然名人二代好多都成為社交圈風頭躉，但咁都唔代表啲auntie冇定企，好似ball後薛芷倫成四張幾都依然夠索，年齡唔再係性感嘅障礙。
薛芷倫企硬
曾經連自己個女都唔俾面，話「Ball後只得一個」的薛芷倫，雖然佢經歷過乳癌折磨，但病癒後每次見人都狀態大勇。上週六晚佢著住條貼身黑裙出席傅明憲生日會，身材fit到漏，更不經意地露出事業線，後生女都要行埋一邊。
鍾麗緹搔首弄姿
一向風騷嘅鍾麗緹，離婚後更騷上加騷，上週四她在愛彼錶派對，一時大派飛吻、一時扭腰擺甫士，總之冇時停。問佢係咪有人追？佢又忸怩避談，再問有冇結婚衝動，佢就話：「我冇諗過，我而家淨係好掛住啲女，離開咗屋企十幾日啦。」
何超雲跌watt
一向敢於嘗試嘅賭王三房長女何超雲，試過染髮、駁髮、露背、低胸，但上個禮拜佢就跌曬watt，冇話題兼衣著冇驚喜，奄悶到爆，好彩上週三重陽節有得同賭王老豆去福臨門食飯（小圖），先挽回頹勢。記者叫佢停低影張相，佢就話：「遲到啦。」翌日返信德時的打扮亦精彩欠奉。
唐貝詩謝咗
寇鴻萍長女唐貝詩（右）初出ball場時扯到行，著比堅尼、曬南北半球，都叫做索過，不過早前佢同毛玉萍兒子Eric分手後，成個人謝曬，而家每次出動都包到冚，反而阿妹唐貝欣就順勢崛起，好似上週五嘅置地男士時裝騷，唐貝欣以小黃tee、熱褲上陣，肉體上、精神上都贏家姐成條街。 ####
47歲
41歲
22歲
上週四她全靠二萬八的紅色Celine袋，千三蚊Jeffrey Campbell紅鞋吊味。
19歲 23歲
1127期
