2011年10月13日 星期四

[壹週刊.直接睇]古巨基晒料玩嘢




紅館睇騷

古巨基上星期在紅館舉行一連三場演唱會,向來唔跳舞、唔露肉的他,秘密狂操兩個月,破例首度在台上露出十三吋手瓜,十五分鐘勁歌熱舞,挑戰極限,交足貨!連續三晚被歌迷催婚的基仔,台上自爆已準備了律師、牧師到場,與拍拖十七年助手女友Lorraine結婚,夠曬玩嘢。

秘密操肌

古巨基為《Amazing World演唱會》獻出四個第一次,包括首度在台上著冇袖衫,露出十三吋粗壯臂,為了讓這隻「老鼠仔」見得人,基仔風雨不改,跟教練勤操兩個月。另一突破,是一part長十五分鐘快歌部分,全程又唱又跳。騷舞技曬手臂外,基仔更第一次當住萬幾觀眾「打茄輪」,與「警鐘胸」Jessica C.演繹一段王子同公主童話情節,深情互嘴超過十秒。據知,錫嘴一幕是臨時添加,排舞師與監製在彩排時有意見,認為加插錫嘴更浪漫,剛剛甩拖的Jessica C.亦覺得劇情需要,還幽了基仔一默說:「只要Lorraine唔介意,我都OK!」最後當然得到基嫂Lorraine批准。

公開氹女

向來封嘴唔提感情事的基仔,連續三晚個唱都被歌迷催婚,他亦識做,在尾場公開多謝助手女友。「係要多謝Lorraine嘅!我發覺佢仲多fans過我,佢好紅咩?我要簽佢出唱片!」基仔公開講女友,全場觀眾更加起哄,大嗌結婚,基仔之後一臉認真自爆:「其實我已經準備咗律師同牧師喺後台。」全場觀眾竟然唔理咁多,將基仔笑話當真話,信曬! ####



穀行巨肌基仔做健身兼飲增肌奶粉連穀兩個月,手瓜粗到有十三吋。



基仔在今年生日會上,被老闆楊受成夾硬拉埋合照。



後台勁舉為了在台上13吋「老鼠仔」更加現形,基仔在後台化妝整頭期間都攞住兩個15kg啞鈴狂舉。



極少跳舞的基仔連跳十五分鐘勁舞,容祖兒睇完之後大為震驚,冇諗過基仔會跳得咁好。



喊曬第一場基仔已忍唔住喊,當他講到:「我未必係最有天份嗰個人,但係我想俾人睇到我係最努力一個!」眼淚一發不可收拾。



周慧敏在基仔開show前一晚睇彩排睇到淩晨四點,尾場又同老公倪震到場支持。



晚晚催婚基仔晚晚被催婚,於是他承諾如果2012年世界沒有末日,他就會之後結婚。



錫警鐘基仔一連三晚都有得錫以「警鐘胸」聞名的Jessica C.。





其中一幕基仔扮魔盜王,坐住巨型海盜船出場。







連隊九杯在慶功宴上,基仔被Mani及其他同事隊啤酒,最後基仔一個人飲了九杯,仍然保持清醒。


1127期