探熱針
五大唱片因版稅問題與無綫反面，雙方糾纏至今仍未達成共識，為此，無綫契仔李克勤亦受牽連。過去兩年克勤守身如玉，堅拒亮相其他電視台，直至近日，克勤終於破戒，以八百萬身價，簽約Now做歐洲國家盃大使，亮相講波。Now成功簽到克勤做節目，但合約形式只限講波，跟克勤老友鬼鬼的無綫新主殼王陳國強，揚言要為克勤開一個新節目，只要對方答應，形式、嘉賓都由他全權話事，誓要在明年六月克勤過Now之前，截對家胡。
守身兩年
早前李克勤正式簽約Now電視台，擔任明年六月歐洲國家盃大使，亮相講波一個月。無綫跟五大唱片為版稅問題反面，旗下全線歌手無法亮相無綫，即使無綫契仔亦不例外，但過去兩年，克勤依然無異心，堅拒出現其他電視台。「克勤好堅持，佢成日話無綫幫咗自己好多，點都唔肯破壞雙方關係，唱片公司同經理人公司喺呢兩年都同佢討論過唔少次，想勸克勤上其他電視台宣傳，但佢通通拒絕。」克勤身邊人說。克勤願意改變主意，除了八百萬講波可觀酬金夠吸引，何麗全亦是一大關鍵。
睇定嚟食
「何麗全由無綫過檔Now之後，一直遊說克勤幫手做節目，何生當然明白克勤對無綫一條心，要打動對方絕唔易，所以『睇啱嚟食』，好似今次做歐洲國家盃主持，就開正克勤嗰瓣。雖然Now出到八百萬請克勤，但其實之前有線都出過一千萬斟佢做世界盃主持，最後都唔成事，關鍵就在於何生呢張人情牌，條件誠意加埋友情，克勤都好難推啦！」
幫手穀碟
終於得米，Now亦做足功夫，全面配合今個月底推出國語碟的克勤。「幫手宣傳唱片也是考慮因素之一，克勤差唔多二十年無出國語碟，所以都好緊張，環球唱片今次好揼本做製作，克勤當然希望有完整嘅宣傳計劃去配合，Now嗰邊講明會有鋪天蓋地宣傳協助。點計Now都係着數！一方面剃無綫眼眉，又唔使等到出年六月球賽開鑼，克勤已經不停上Now嘅節目！」
左右為難
據了解，克勤與Now所簽的主持合約，只限講波（歐洲國家盃），所以克勤仍可按不同形式，亮相其他電視台，與無綫的友好關係，絕非一刀切！
近日便有傳陳國強提議開新節目讓克勤孭飛，如果成事，節目形式和嘉賓都由克勤揸弗。
「殼王都唔止講咗一次，話隨時歡迎克勤上無綫節目，但克勤同環球唱片續咗約，手掌肉手背又係肉，幾方面都要照顧到，就算合作，都唔可以輕舉妄動。」克勤身邊人說。
大條道理
「無綫契仔」李克勤，多年來守身如玉，只肯亮相無綫，事緣當年他處於事業低潮時，無綫照搵他拍劇、做主持，令他保持曝光，最終重新彈起，知遇之恩，克勤堅決效忠，大條道理。
拆招牌
克勤一向尊重跟無綫的合約精神，出席公開活動，都拒絕以廣東話接受有線訪問，並要求對方移走有線咪牌，直至近大半年，克勤的企硬態度才稍為軟化。
志雲飯局
06年11月，克勤與盧淑儀拉埋天窗，婚前婚後，克勤兩度上《志雲飯局》接受陳志雲獨家專訪講結婚感受。
有錢唔賺
去年有線以1000萬力邀克勤過檔做世界盃主持，但他一樣拒絕，錢都唔要。
拒現身亞視
「五大唱片」跟無綫決裂，一眾受影響歌手紛紛先後亮相亞視，張學友帶頭做亞視音樂節目，謝安琪與陳奕迅亦上亞視做專訪，環球大牌歌手中，唯獨克勤一直堅持。
大好友
克勤與「殼王」陳國強是多年老友，二人經常相約飯局打golf，克勤結婚，「殼王」更送上百萬賀禮。
百萬賀結婚
06年克勤與盧淑儀結婚，「殼王」送上百萬，贊助新郎新娘等一行十五人，到英國影婚紗相，作為賀禮。
送讀書基金
克勤大仔Ryan 07年出世，「殼王」即答應設立讀書基金，賀Ryan出世。
自己友
「殼王」、克勤、陳百祥都係自己友，每年叻嫂黃杏秀生日，克勤必定拖埋太太，與「殼王」齊齊蒲頭。
打golf
克勤、阿叻、「殼王」嗜好類近，經常相約到內地打高爾夫球。 ####
一家三口行街，選擇人流一般的屋邨商場，低調家庭樂。
早前克勤趁住放假，陪老婆、大仔Ryan及親友到將軍澳厚德商場shopping，兼到冒險樂園玩。
臨走時，盧淑儀一直照顧同行的父母，為食的Ryan則食住蝦條乖乖跟在後面。
活潑好動的Ryan經常紮紮跳，更拋下老豆箭步衝入玩具鋪。
盧淑儀在波鞋鋪左揀右揀，更拿着波鞋詢問售貨員意見。
何麗全自今年三月過檔NOW出任首席副總裁後，便經常邀請克勤亮相NOW節目，更將與好友阿倫、克勤等飯局的相片放上微博。
殼王陳國強入主無綫後，多次遊說克勤到無綫做主持，但身為「五大唱片」歌手的克勤身份尷尬，一直唔敢輕舉妄動。
克勤與NOW簽約為明年六月的歐洲國家盃擔任主持，克勤早前已為NOW錄影了兩個節目，其中一個是接受好友梁榮忠的觀星台訪問。
NOW除了以八百萬天文數字力邀克勤亮相，更答應在他月底推出國語大碟時，全力替他宣傳，早前克勤開始為新歌拍攝MV。
以往無綫直播世界盃，克勤例牌有份做主持，但「五大唱片風波」爆發，克勤不能亮相無綫，去年的世界盃也被踢出主持之列。
克勤倒戈無綫簽約NOW做主持，他亦無奈表示：「我個仔俾我壓力，佢要食飯，要交學費。」
1127期
