2012年11月7日星期三

[FACE]Eason戒煙失敗

FBI

Eason戒煙失敗

2012年11月07日

天氣轉涼， FBI最想烚嚇烚嚇暖暖個身，點知就行大運，喺天後由傅珮嘉新開嘅台式火鍋店「一鍋」，撞到「吹神」陳奕迅同阿嫂徐濠縈同大班 friend。

鋪頭入面就打邊爐，連出面都有班煙民「打邊爐」，正牌邊爐打到中場，飽得咁上下， FBI就見到 Eason張枱走咗大半枱出街解煙癮，其中都包括「吹神」自己。

其實 8年前阿女康堤出世，大煙癮 Eason曾經為阿女戒過煙，仲周圍提倡戒煙好處，話人健康咗唱歌又好氣咗，不過戒咗兩年又食番咋嘛。早兩個月 Eason再話過要戒：「我係嗰啲地震淨係會攞銀包同煙嘅人，我都知個習慣唔好，𠵱家開始新一輪戒煙行動。」眼見為實，即係吹神嘅新一輪戒煙行動又失敗啦！

話時話， Eason成日周圍飛巡迴，好少時間陪到老婆，嗰晚 FBI就見 Eason同阿徐把握機會傾番夠本，食完飯阿徐同班女人返歸，男人就打的走下場。有班共同朋友夫妻檔一齊食，食完又各自有活動，呢啲夫妻關係先叫有空間吖嘛！

放大圖片