2012年11月7日星期三

[FACE]江湖規矩　 III級家法侍候　陳偉霆爆缸酷刑

打都不特止，仲要除曬衫掟出街，好在著住 boxer嘅威廉激凸，班粉絲先冇咁心痛咋！

真面目

江湖規矩　 III級家法侍候　陳偉霆爆缸酷刑

2012年11月07日

當年一系列《古惑仔》成為港產片經典，「浩南哥」鄭伊健到今時今日仲未捨得放棄佢把飄逸長髮，擺明仲懷念緊風光 90年代。

江湖片無以為繼，今年突然打孖上，先有陳偉霆同詩雅的《紮職》下週四（ 15日）上畫；另一套由羅仲謙做嫩版陳浩南的《江湖新秩序》又湊熱鬧拍埋一份，不過男人老狗刻意爆肌做賣點，被網友恥笑似鴨仔多過古惑仔。其實要有大佬格唔使下下出胸器，好似陳偉霆咁著住孖煙囪爆缸咪仲 man！

做過學生哥、早洩男同港鴨，但從未拍過江湖片的陳偉霆今次唔賣靚樣，改行打打殺殺做古惑仔。所謂出得嚟行預咗要還，威廉在戲中未上位前，經常慘受毒打酷刑，其中一幕被對頭人林利捉去棺材鋪，剝剩條底褲執行家法，打完仲要推出街半裸淋雨，肯定肉赤死阿 Sa。

放大圖片

打到眼腫

陳偉霆被黑社會大佬林利毒打，右眼爆曬，傷過鄭嘉穎喎！

放大圖片

威廉俾吳浩康（左）㩒住打，除咗叉頸挑釁，仲唔覺意踢中對方顴骨。

放大圖片

成手瘀曬 <br><br>除咗靚樣受損，威廉隻手都打到瘀曬，連佢媽咪探班時都話心痛。

成手瘀曬

除咗靚樣受損，威廉隻手都打到瘀曬，連佢媽咪探班時都話心痛。

放大圖片

連摑 10巴 <br><br>有錢女詩雅喺夜場得罪大家姐溫碧霞，俾對方手下又扯頭髮又兜巴星，最後俾人打到流曬牙血先收貨！

連摑 10巴

有錢女詩雅喺夜場得罪大家姐溫碧霞，俾對方手下又扯頭髮又兜巴星，最後俾人打到流曬牙血先收貨！

踢爆顴骨

剝光豬羞辱，威廉更要同另一古惑仔吳浩康埋牙。飾演有錢女友的詩雅就唔識死，得罪黑社會大家姐溫碧霞，連英雄救美的威廉都被打埋一份，由於兩個都學過泰拳，拍攝時拳拳到肉，威廉更誤中一腳踢爆顴骨。

「我同阿 Deep（吳浩康）都想出嚟效果逼真啲，所以全部真打唔借位，點知有一下佢伸腳踢我，我避唔切中曬，結果顴骨即刻腫起，咁啱我第二日接咗個騷，惟有落勁厚粉遮住！」

摑到頭暈

男人拳鬥濕濕碎，估唔到詩雅都慘遭毒手，雖然冇徐子珊被輪姦一秒咁陰功，但同樣冇替身冇借位，被怒摑都要硬食，詩雅講起都仲口窒窒：「嗰場戲講我得罪溫碧霞，佢班手下捉住我嚟摑，加埋試位前後俾人打咗接近十巴，打到我都暈暈哋！不過最傷反而係我趴喺地下時，企喺附近嘅威廉忽然失重心踩咗落我隻手，你知佢咁鬼大份，痛到我標眼水呀！」

意外冇人想，鄭嘉穎扮葉問被打爆眼角袋少成百萬仲痛啦！