十年功　江美儀

東周刊 第480期

江美儀甫到來訪問取景的酒吧，即嚷著肚子餓，二話不說便拿起餐牌，替在場各人點吃的喝的，連隨向攝影師查詢要怎樣拍照後，便坐下來跟我開始做訪問。我看看手表，前後才不過五分鐘時間，可見她確是個爽快直接的人。所以，對於很多網民以「重口味」來形容她在《名媛望族》中，那場「黑絲襪情挑劉松仁」的戲，她很難沒有反應。「我覺得唔好當嗰兩個人係江美儀同劉松仁先啦，其實只係鍾卓萬同三太啫，呢啲只係一對夫婦嘅閨房情趣。啲人話『重口味』，都係因為佢哋覺得咁嘅年紀嘅人，唔好搞埋啲咁嘅嘢，但我覺得unfair囉！係咪過咗廿五歲就唔做得呢啲嘢先？係咪一定要年輕人先做得呢？咁年輕人都唔使做呢啲嘢，一嚟就砌o架啦，係咪先？情趣嘅嘢係冇年齡限制o架嘛！」那場戲是否真的「重口味」，見仁見智，但因此令她人氣急升，卻是不爭的事實。「都係o架！以前可能你除到得番條襪帶，都冇人會記得你做過呢場戲；但依家，只係需要咁樣，全世界已經知道曬！「不過如果冇以前嘅經歷，就唔會有依家嘅我！」她說的「以前」，就是那十年在亞視的日子。

十條片

一場「黑絲襪情挑劉松仁」的戲，大大加強了網民和觀眾對江美儀的注意，當事人有這樣的分析：「一來，喺電視尺度嚟講，個意識係大膽嘅；二來，因為有絲襪帶，又魚網絲襪，我件衫嘅outfit又好靚；三來，江美儀從未試過咁樣見人；松哥呢，喂，佢不嬲都係嗰啲乜嘢『中原一點紅』、『陸小鳳』嚟o架嘛，我哋大家都畀咗『第一次』對方，啲人睇到咪都『嘩！』咁囉！」

被網民形容為「重口味」，她是有點不是味兒的。「咁樣形容，我覺得係抹煞咗成個劇組嘅努力同心血囉！

「好坦白講，我冇波又冇籮，視覺上，我已經輸蝕咗！咁我可以點樣令呢場戲好睇呢？咪惟有去鑽研形態同神情囉！

「松哥拍之前收到個分場後，就畀咗十條YouTube短片我睇，仲同我講：『，第三條片啲眼神，你可以去學；第六條片啲衫，你可以去參考；第七條片啲舞姿呢，你可以多啲留意。』監製仲特登搵咗個跳舞老師教我跳呢隻舞，本來我可以學多啲、跳得好啲，但最衰我嗰段時間扭傷咗隻腳，根本痛到行唔到，我都係夾硬去跳o架咋！所以我覺得其實呢場戲可以再好啲、再靚啲o架！」

九十年代當model時，曾當過劉德華卡拉OK MV的女主角。

天生嘅

江美儀生於一個小康之家，父母都在銀行從事文職工作，居住私家樓長大，對下還有一個妹妹。她小時候已有三個志願，就是做秘書、選港姐和做空姐。

「我由細蚊仔開始，已經好鍾意投入角色。例如我細個會幻想自己係個公主，睇書嘅時候，我會扮個公主樣出嚟；行大丸嗰條樓梯時，我又會諗：如果我係一個公主，應該要點行呢條樓梯呢？鍾意演戲，真係天生o架！」

結果，她在珠海書院讀了工商管理，投身社會後由接待員慢慢升職到做秘書，沒想到，因為一次為老闆買午餐，卻被星探發掘，令她當上了model。

「我嗰陣最初都驚畀人呃o架，所以我就畀咗我以前男朋友個電話佢，點知佢就係咁call咗我半年，我就諗：你呃我嘅話，冇理由呃我半年呀？喂，我有乜嘢畀你呃啫？咁都搵足我半年？諗諗嚇可能係堅o架喎，咪去試嚇鏡囉！」

就這樣，她開始了拍廣告的生涯。「我第一個廣告就係『蝶安護』衞生巾，一個女仔對住鏡頭乜都冇，係咁講十五秒、三十秒嘢。跟住喺電視度，真係不停咁見到我，噏得出嗰啲大牌子我都拍過曬，『麥當勞』我拍過兩次，『美極』又拍過，衞生巾廣告都拍過兩、三次，仲有『太太口服液』都拍過兩、三次。」

當時與她同期的，還有歐陽妙芝、周汶錡和楊崢，「你諗嚇嗰期出幾多靚女？嗰陣做model好嚴o架！唔夠高，就只可以拍still（硬照）、拍電視，冇得行天橋，我就係因為唔夠高，所以冇得行。」

天橋沒機會行，但選美，卻還是有想過的。「我真係有諗過o架，不過我爸爸唔鍾意，佢覺得如果我拍廣告著泳衣，係為咗個product；但我選美去著泳衣，就係為咗我自己，佢覺得我唔需要著泳衣去sell自己。」

麥當勞是她拍得次數較多的其中一個廣告商。

那十年

九七年，亞視開拍《肥貓正傳》，劇組主動找她當女主角。「我入去嗰陣，《肥貓》都有廿幾點o架！本來我諗住玩o架咋，但出嚟嘅效果又幾好喎，咪再拍嚇囉，咁我又好enjoy拍戲喎，咁咪玩嚇玩嚇，就係咁拍落去。」

曾道聽途說，江美儀在亞視時期，是個很有脾氣的阿姐。「我嗰陣係比較寸，真係年少又氣盛。有段時間，我仲有埋抑鬱！唉，女人為乜嘢呀？唔係為男人就係為錢，嗰陣我錢就冇問題，但就失戀，個人好唔開心，成日搵啲工作人員嚟出氣，搞到個個都覺得我神憎鬼厭！」

隨著亞視的收視每況愈下，她亦曾有過離開的念頭。「不過嗰陣人工真係幾好喎！幾皮嘢一個月，又冇嘢做，仲想點呢？人工可以話係我唔走嘅一個原因。不過後尾都開始cut人工，又冇嘢做，我就覺得大鑊。到○七年，我滿約，一個月前乜嘢條件都傾好曬，我都打算續約。點知，星期五滿約，星期三竟然打嚟話要由頭再傾過！咁即係想點呢？我把鬼火打畀我男朋友同佢講，佢話：『如果你依家唔續約，你會嬲；但如果你續咗約，你會仲嬲！咁唔好簽啦！』就係咁，我就冇簽到約，走咗。

「啲人成日問我，覺唔覺得喺亞視嗰啲日子浪費時間，我覺得，我嗰陣其實一秒都無嘥過！你諗嚇，嗰陣乜都要自己搞掂曬，冇嗰十年，邊度train到我依家周身刀？冇嗰十年，我依家點會識同做嘢嘅人好好相處呀？如果以我嗰陣嘅性格入無綫，我一早都可能已經淘汰咗啦！」

九七年被邀加入亞視當《肥貓正傳》的女主角，更因此成了鄭則士好朋友。

一個騷

她說，那時離開了亞視後，感覺猶如「被遺棄的一群」。「我當時真係好想搵番份工，做番秘書，我男朋友話：『你咪癲啦！你做開戲，點可能無端端搵番份工o架？』咁我就走咗去學油畫。好彩後來都仲有個電台節目《風騷快活人》救一救我，叫做有啲嘢做嚇，有啲生存價值——呢樣嘢仲緊要過搵錢呀！」

○九年，機緣巧合下，江美儀加入了無綫。「當時張約都幾辣o架！兩年一個騷！咁你簽定唔簽呀？我簽呀！其實我預咗呢間公司唔會畀我好多錢，但我又想做嘢，又返唔到亞視，唯一嘅出路就係：理得你開乜嘢條件，我入咗嚟先算！」

諷刺的是，她加入TVB後，便一直劇接劇地拍，沒有停過，卒之第一年，她做了足足九十多個騷，第二年也有八十多個！「你唔好畀我入嚟，你畀得我入嚟，我知我會OKo架！因為我人工好平，平到嚇死你，平到你唔信！我又知自己唔會失禮人、交到貨，咁人哋就自然會搵你o架啦！」而更主要的關鍵則是：「我襟撈爛做冇投訴！」

呢啲咪係專業囉！

加入無綫的首齣劇集，就是與伍衛國（右）和梁烈唯合演的《五味人生》。



《潛行狙擊》中的「嵐姐」，是江美儀暫時較滿意的演出。

七年情

現任男友是吳君如的胞弟吳君祥（Vincent）。「我同Vincent個細佬（即吳君如細細佬）同一間小學，當時我都知道佢係夏春秋個仔，不過離開咗小學之後，我哋就冇見過面。之後喺一個function度識到Vincent，我就同佢講：『我小學時暗戀過你細佬o架！』點知佢話：『太遲啦！佢已經結咗婚喇！』後來我哋開始send sms，跟住就開始拍拖。」至今兩人已拍拖七年，早已在同居階段，男的雖比她大四年，但彼此卻仍會以「BB」來相稱。「我哋兩個好好笑o架，

真係急驚風遇著慢郎中！佢個人好糯，我就急到死！永遠係我等佢出門口，佢就mememomo，

淨係撥條頭髮都撥成半個鐘，都係為咗嗰條毛，都唔知撥乜！哈哈哈！「不過好奇怪，每次我驚恐症發作，喊到就嚟暈嘅時候，佢都咁啱會喺我身邊，好似係個天安排佢嚟處理我呢個問題咁！佢個人真係好冷靜，好多時都可以令我calm down！」沒有結婚的打算，只因覺得沒必要。「大家日日都好似拍緊拖咁，仲有驚驚哋，咁唔係仲刺激啲咩？我意思仲驚緊嗰個係佢，唔係我呀，我仲有好鬼多marketo架！依家出埋呢個『黑絲襪』呀，佢喺屋企騰緊啦！哈哈哈！」OK，那話說回來，阿BB又點睇這場「黑絲襪」戲呢嚇？「嚇？佢淨係話我好似麻甩佬操兵咁，叫我都專注做番內心戲喎！」說罷，她反曬白眼，我卻在旁笑到肚攣。

江美儀最近與男友吳君祥成立了黃金時代娛樂公司，旗下藝人有龍小菌（前右一）。

.十年功　江美儀
http://hk8news-e.blogspot.com/2012/11/blog-post_5502.html