羅仲謙黃智雯專訪 謙仔大男人恨養楊怡

從《搜下留情》、《缺宅男女》、《On Call36小時》、《飛虎》到今日的《巴不得媽媽…》，羅仲謙與黃智雯一直合作無間，這對差不多同期出道的拍擋，直言不擔心觀眾會對這組合生厭，反而因大家的轉變而有新鮮感。對著另一紅顏知己楊怡，謙仔就堅稱與她處於互相了解及順其自然階段，但謙仔坦言不想太遲結婚，並指自己是大男人，希望事業有成可養得起老婆。撰文：何慧斯

羅仲謙日前和楊怡鬧出車廂親熱事件，他在明天結局的《巴不得媽媽…》中演少爺仔翟有聲，鍾情由黃智雯飾演，在劇中有案底、出身寒微的夔懿曦，雖然被媽媽汪明荃多次棒打鴛鴦，不過謙仔最終排除萬難，與黃智雯有情人終成眷屬，但在現實中，謙仔就堅稱與楊怡處於互相了解及順其自然的階段。

羅仲謙經常取笑黃智雯，但因兩人老友，智雯毫不介意。攝影：仇志德

羅仲謙覺得自己今年成績不俗，希望在無綫頒獎禮攞獎。

黃智雯與羅仲謙合作無間，拍照也甚有默契。

「我有腰骨」

謙仔與黃智雯早前在赤柱受訪，當時謙仔被指與楊怡曾結伴到韓國旅遊，更傳出謙仔已低調求婚，問謙仔是否有意將戀情變為地上化？他說：「唔好講呢樣嘢，公司冇畀壓力，只想專注工作。」再問謙仔拍拖是否工作的原動力？他笑說：「屋企對我就有原動力，有大把人等我養，我比較大男人，好細個已經計緊將來要養幾多人，男人會有好多頭家要照顧，我有腰骨㗎，仲好直！」

28歲的謙仔，承認對結婚計劃有改變：「以前我會從年齡方面去計劃，希望可以喺35歲結婚，家覺得要工作環境同感情穩定，配合天時地利人和，愛情要講timing，timing到可以結婚，我唔想太遲，不過呢個只係我自己嘅諗法。」他續說：「我唔貪心，唔係話希望一年賺幾多千萬，但我覺得事業可以再好啲，對自己有個交代，唔可以結咗婚冇錢養老婆。」

羅仲謙與楊怡表示雙方仍在了解中。資料圖片

黃智雯讚羅仲謙很會照顧身邊人。

愛取笑智雯

對於坊間認為謙仔與智雯在《巴》劇的感情線略平淡，兩人口徑一致表示覺得很浪漫，智雯說：「有時唔係要親暱先營造到浪漫感覺，反而點到即止、若即若離嘅感覺仲浪漫。可能家嘅愛情一嚟就好close，好少會有戲中嘅感覺，我反而覺得喺戲中，可以搵番純真同初戀嘅感覺。」謙仔附和說：「我哋個畫面有少少似拍MV嘅感覺，畀人哋多咗幻想空間。好似我同佢表白嗰陣，可能有啲觀眾會覺得點解唔錫落去，我哋就係刻意咁做。我同智雯互相睇住大家成長，呢個轉變令大家有新鮮感，加上我哋喺《飛虎》未開始發展套劇已播完，今次可以令觀眾有多一個延續嘅幻想空間。」

避談姊弟戀的謙仔，提到與智雯合作無間，他即放下避忌，回復爽朗本色，並說：「如果你問佢，佢梗係話係好姊妹，你問我，我梗係話好兄弟，默契係隨時間培養出嚟。同佢做對手戲，我哋好明白大家嘅底線，唔擔心激嬲大家。多數都係笑佢髮型、身形，乜都笑一餐。」

盼攞飛躍獎

智雯讚謙仔很照顧拍擋，謙仔搶答：「咪好似翟有聲咁，就算我好照顧身邊人，但唔會好溫柔，都係粗魯。好似見到佢個髮型或者個妝好亂，會直接話好核突，快啲去執執。」智雯問謙仔對其他朋友是否一樣？他笑說：「對咩呀？咁又唔得，人哋會嬲㗎。」

近期謙仔在無綫的發展不俗，問他對頒獎禮有否信心？他笑說：「希望有獎呀！我對自己有信心，今年成績唔錯，仲試埋登台，我覺得唔算遲，有啲嘢係要累積得嚟，唔可以一步登天。男配角獎唔敢望，我目標只係男飛躍，算係個肯定，對屋企人有個交代。」

.羅仲謙黃智雯專訪 謙仔大男人恨養楊怡
http://hk8news-d.blogspot.com/2012/09/blog-post_7428.html