2012年9月22日星期六

[忽然1周]楊謹華　豁出去

由 08年開始，楊謹華就是內衣品牌「曼黛瑪璉」的代言人。她自言屋企有 100套內衣，又話美胸要由內衣做起。呢個代言人算係咁啦。

亞熱帶

楊謹華　豁出去

2012年09月21日

08年憑《敗犬女王》走紅的楊謹華，出道二十年一直肯搏肯捱，不但連續五年成為內衣品牌代言人，攞正牌大騷身材，拍劇亦冇話錫身，應露則露。不過花無百日紅，楊謹華都三十有四，她在新劇《原來愛．就是甜蜜》繼續賣弄胴體之外，更進一步豁出去，首次做人阿媽，正式向演技派進軍。

性戰連場

02年，楊謹華在《台北晚九朝五》（左）女上男下露 bra擒男主角。之後在成名作《敗犬女王》她又與阮經天（右）玩一夜情。

放大圖片

在《原來愛•就是甜蜜》，楊謹華飾演的田如蜜本來是校園公主，不過因為被靚仔搞出人命，獨自帶大兒子，靠做導遊為生。十年後，田如蜜重遇學生時代暗戀自己的李勁陽（王陽明飾）……

放大圖片

由於劇情薄弱所累，楊謹華和明道主演的《鍾無艷》口碑麻麻。好在《原來愛•就是甜蜜》口碑不錯，平均收視大約有 120萬人，楊謹華才守住個招牌。

放大圖片

楊謹華 09年拍《敗犬女王》時，已經睇中同劇細自己五年的懷秋，不過等到懷秋同女友分手，楊謹華至主動出擊。今年 6月兩人情侶裝睇戲（圖），但 9月又傳出楊謹華逼婚失敗致兩人分手。

中學掛住仔

楊謹華讀書時雖然冇搞出人命，不過就絕對唔係乖學生。她早前被舊同學踢爆曾經呃阿媽錢落 Disco跳舞，又試過租酒店開 P；她又自爆高中時會同阿媽講去圖書館溫書，其實就去溜冰場同 K場瘟仔。楊謹華解畫時咁講：「平日屋企管得太嚴，沒太多機會同朋友玩，自己對夜店又好奇，回想都覺得好瘋狂！」

講到玩，楊謹華就真係熟路。早前《原》劇到高雄拍外景，楊謹華爺爺住高雄，佢年年都會去探老人家，於是楊謹華化身導遊，帶大家食地道米糕同睇名勝，搞到遲了到台中宣傳。

同姊妹舊愛咀嘴

至於男主角王陽明，早前因為他是「台灣陳冠希」李宗瑞的好友而被台灣傳媒追訪。王陽明是蕭亞軒舊愛，而蕭亞軒又係楊謹華好姊妹，所以王陽明認識楊謹華十年有多，不時恃熟賣熟明寸楊謹華。

楊謹華戲中有不少古怪扮相，王陽明當住記者面前取笑她：「嘩，你真夠膽，真的著出來見人！」之後又嫌她的造型太娘，宣傳時刻意唔企楊謹華隔籬。反而楊笑笑口話：「即是代表我變身成功啦！」咁至係識撈吖嘛！《原來愛•就是甜蜜》逢周日晚上 8： 30在 J2播出，想睇兩人點擦出火花，就擔定櫈仔啦！