娛聞樂
內地酒吧唱出頭 蕭正楠吸金力逼陳豪
2012年09月21日
TVB人工公認奀，不過勝在「劇集效應」強勁，可以帶挈小生及花旦在內地登台及接廣告，收入比無 綫月薪高幾倍。唔講唔知，無 綫一線小生因為劇接劇，失去好多登台機會，加上揀擇唔做細場，二線小生於是接棒執死雞，個個禮拜北上搵外快。
去年陳豪贏蕭正楠奪陳茵媺芳心，講溝女蕭公子輸一仗，不過論銀，密食當三番的「酒吧小王子」蕭正楠，登台價高達 8至 10萬元人仔，加上食住條水長做長有，一年埋單登台賺逾 5百萬，吸金力與一線的陳豪原來叮噹馬頭。
唱歌出身的蕭正楠（ Edwin），自 08年簽予 TVB後主力拍劇。全靠劇集播出，令他在內地人氣急升，登台騷反而成為其主要收入來源，而且好和味㖭。據知他每周平均北上掘金一次，每次唱二十分鐘就穩袋 8至 10萬人仔，認真易賺。如遇正有新劇，例如 4月播映《當旺爸爸》時，蕭正楠最高峰每周更返內地登台 5次。
肯接酒吧騷
單以騷價計，蕭正楠與一線小生陳豪比，依然有距離，但因為陳豪不停劇接劇，難以度期，根本無暇北上掘金。同時，大部分小生都只肯接商場騷及大場騷，對酒吧登台的工作興趣不大。而在眾小生當中，只有謝天華及蕭正楠願意在內地酒吧登台，不過謝天華的登台價高達 20萬，令不少酒吧老闆卻步。相反蕭正楠樂於接酒吧騷，騷價又合理，所以即使在無劇播的淡季下，他每月都穩袋逾 30萬人仔。
被封為「酒吧小王子」的蕭正楠笑說：「個名幾好笑吖！北上登台真係我近兩年 嘅主要收入，《當旺爸爸》播映時，個個禮拜都有三、四次登台，好多現場觀眾仲指定要我唱〈遙遠的她〉，因為劇中我唱過，佢哋覺得感動。（收十萬唱廿分鐘？）都係辛苦錢啦！試過去汕頭登台，來回車程十小時，夜晚出發，天光返來，不過我知道拍劇至係主要 嘅工作，登台係 bonus啫。」勁識賣口乖。
將軍澳置業
至於被指收入直逼過氣情敵陳豪，蕭謙虛說：「佢唱一次等於我唱十次啦，佢 哋身價高過我好多！其實真係多謝公司，盡量幫我度期，等我可以出去登台搵外快。」蕭正楠將近年的登台收入儲起，用作置業，他說：「最近開始物色地方置業，希望喺公司附近買一個細單位，一方面當 studio，另一方面又方便返工。不過阿媽唔肯搬來將軍澳住，所以如果置業成功，我就會有兩頭住家。」
蕭正楠與陳豪的新劇《天梯》本周一（ 17日）首播，另外台慶劇《大太監》蕭正楠亦有份演出，更有機會問鼎「飛躍男藝人」，名利雙收。
小生北上騷價
賺人仔並非近年當紮小生的專利，好似吳啟華及關禮傑早在十年前已轉移陣地北上覓食，他們的酬勞雖然不及當紅小生高，不過大陸美容廣告活動愛邀請中生出席，坐下講兩句保養心得就有 8萬酬勞，都好和味。而謝天華食住 Laughing哥個勢，在內地登台價同林峯睇齊。
當紮 chok男
林峯少接登台騷，基本上有價冇市，謝天華就食住 Laughing個勢。
視帝級數
以前黎耀祥好多騷都是黐住朱咪咪，近年才升呢；陳豪則主要接香港商場騷，少返大陸登台。
上位小生
兩人都係靚仔，曝光率又高，不過近日同受緋聞困擾。
過氣中生
兩人勝在保養得好，大把美容騷同登台騷。
實力二線
兩人非唱家班，所以騷價一般。
.[忽然1周]內地酒吧唱出頭 蕭正楠吸金力逼陳豪
http://hk8news-d.blogspot.com/2012/09/1_22.html
