娛一叮
無綫與四大唱片拉鋸了近兩年的版稅糾紛，終於告一段落，也意味着四大唱片為首的環球歌手，如陳奕迅、李克勤及謝安琪等，即將回歸無綫。
而Eason更即時做嘢，派新歌趕及季選，為奪《勁歌》男歌手獎做好準備。
去年四大唔玩，益曬英皇歌手及巨聲班底，而男歌手獎更落在獨大的古巨基手上。
雖然今年古巨基人氣下滑，早前開個唱銷售不理想，更有傳大量派飛，但因為英皇與無綫關係友好，所以男歌手獎本來亦是他囊中物。
可惜現在無綫與四大唱片傾掂數，Eason、克勤回歸，古巨基形勢極危，想冧莊攞男歌手獎肯定有難度！
無綫與四大唱片公司破冰，其中，陳奕迅所屬的環球，即開行turbo，為爭《勁歌》男歌手獎做好準備。知情者話︰「為咗穀Eason攞獎，環球私下俾咗壓力HKRIA的鄭文超（四大唱片代表，與無綫傾版稅問題），叫佢年底前同無綫傾好細節，好讓環球可及時將Eason嘅新歌〈張氏情歌〉，安排在無綫播放，趕及季選；再配合11月初唱片推出的宣傳攻勢，環球今年要同Eason攞番個男歌手獎。
「環球為咗同無綫傾掂數，一人讓一步，收嘅版稅係最初要求嘅一半，比以前收多唔夠1成；而無綫亦放寬咗，俾四大唱片嘅歌手去其他台亮相，若無綫與其他電視台的工作撞期，則以無綫的工作優先。」知情者話。
而HKRIA CEO鄭文超亦證實了破冰傳聞：「我哋承認雙方都有作出讓步，版稅問題可望年底前解決！」問到是否加快腳步趕頒獎禮？他表示︰「我都想盡快傾妥，依家同好多高層會面，當中都包括陳志雲。至於爭獎呢部分，就唔係我職責範圍內。」
回應遊花園
雖然有望年底亮相無綫，不過，本周一（17日）為亞視《亞洲星光大道4跳舞吧！》錄影完的Eason，談到公司環球與無綫破冰，依然帶記者遊花園：「邊塊（冰）呀？公司叫我話唔知。（係咪年底可重返TVB？）我不嬲都主張多啲平台。（之後可以自由出入其他電視台？） 始終要經過警衛，今日我入嚟（亞視），佢哋都會check我點解你唔係何守信？嘻嘻……感覺奇幻。」
問到返無綫同古巨基爭男歌手獎，他說︰「唔好成日集中我同古巨基啦！都未知，係講質素，唔好話電視台，好多嘢唔係理所當然……消費者都有得揀，對歌手嚟睇係好事。」
其實無綫自從與四大反目以來，一直被廣告商詐型，投訴節目來來去去只得一班奀星。加上雖不屬四大，但有不少皇牌歌手的東亞，不滿去年《勁歌總選》分豬肉唔勻，今年已勒令旗下歌手約滿無綫後唔續約。眼看箍唔到鄭秀文、楊千嬅和許志安等紅星，殼王（陳國強）上場後，即派陳志雲做說客，鋪路與四大和好。
英皇從中作梗
陳總一向與環球歌手張敬軒及李克勤私交甚篤，當然出盡力和談。本來去年進展順利，可惜英皇收到風，做嘢反擊。知情者說︰「英皇派咗高層同無綫交涉，話︰『我哋平咗版稅咁耐，你哋要歌手，我哋亦support。你哋咁樣(同四大傾掂數)會對我哋好唔公平……』亦因為咁，拖慢了和談進度。」知情者話。
記者致電英皇娛樂執行董事兼行政總裁，及身兼IFPI主席的吳雨，他說︰「四大同無綫傾掂數？我冇聽過！我相信如果雙方真係談得攏，無綫會第一時間通知我。無綫有佢哋立場，會顧及我哋，始終我哋support咗佢哋咁耐……（Eason後勁淩厲，對古巨基冧莊攞男歌手獎好大威脅？）頒獎禮係全年計嘅，如果咁，就對我哋好唔公平。以我所知，依家無綫同四大未落實，今年內唔會有變動。」
環球與無綫想盡快促成合作，但中間夾住個關係千絲萬縷的英皇。今年男歌手獎，Eason與古巨基未爭之前，環球與英皇就先來個拗手瓜。 ####
年尾返嚟同你鍊過！（設計對白）
10月17日入亞視踩無綫
闊別無綫差不多兩年的Eason，雖然年尾大有機會回歸，但他上亞視錄影時，依然寸嘴，踩無綫「有陣味」，又讚亞視「開揚」，勁玩嘢！
點解隻瘟神趕極唔走！（設計對白）
去年頒獎禮環球冇咗無綫這個平台，惟有全力穀電台，更獲商台及港台支持，環球的Eason、張敬軒及謝安琪眾歌手，更拉隊到電台慶功。《蘋果日報》圖片
雖然台下冇觀眾，但Eason都算落力，唱歌唱到七情上 面，表情趣怪。問他亮相亞視怕唔怕冇人知？他說：「我咁大口，點會冇人知！」
10月18日到NOW接受訪問
今年世界巡迴的Eason，還會到台灣開個唱。為了11月新碟宣傳，兩個禮拜內做了各電台及電視台訪問，還plug了新歌〈看穿〉上台。
11月宣傳新戲
Eason的新戲《東成西就2011》，由劉鎮偉執導，故事講述８個因爭鬥不休被貶入凡間的天神的故事。女主角莫文蔚向地下錢莊借錢，被Eason追債。
07年平分春色
07年度《勁歌》中環球的Eason囊括了兩個男歌手大獎，而英皇的容祖兒則攞女歌手獎，平分春色。《蘋果日報》圖片
09年英皇獨大
去年四大唔玩，男歌手獎由英皇的古巨基及林峯瓜分，而女歌手獎也是英皇容祖兒，東亞的千嬅只攞個亞太女歌手。
847期
