媽咪姐手帳
那英前夫高峰喺北京結婚，因為一句「第一次結婚」，即俾網友圍插，話佢咁講對那英唔公平。而正喺台灣宣傳新專輯嘅那英，因為不滿記者對此事嘅提問，竟然用手機怒擲記者。事後不單台灣人對呢位過氣天後不滿，連之前為佢抱不平嘅網友亦轉軚，覺得佢咁粗暴，同女流氓冇分別。
那英失控，除咗引嚟各方面不滿外，其實最㷫嘅係韓國Samsung。咁又關佢哋乜事呢？原來７月時，Samsung曾以新款S5520（台灣型號）型號手機贊助佢新歌 MV，亦打算簽埋佢做代言人，卻估唔到那英會將手機攞嚟當飛鏢。所以有傳該公司已將搵佢做代言人一事hold住。那英今勻賠了形象事小，辣㷫米飯班主先最大劑。 ####
那英一聽到記者提「高峰」兩字，即時發曬爛渣，攞手機擲向記者。台灣《蘋果日報》圖片
手機當飛鏢
呢款就係俾那英攞嚟當武器用嘅Samsung S5520型號手機，屬摺疊式機種。
惡形惡相
那英擲完記者，依然不斷向記者爆粗，老公孟桐見老婆失控，拿拿臨扯佢返入餐廳。
無面見人
事後由蔡健雅陪同餘怒未息嘅那英離開。
幾時都話啦，忍一時之氣，海闊天空。依家幾瘀呢。
847期
