媽咪姐手帳
天氣愈來愈乾燥，皮膚響曬警號！又係女士們努力「hold住」靚樣嘅時候，尤其人到中年嘅熟女更要加把勁。好似上年做纖體代言嘅小儀大騷S身材，嗰件透視旗袍look入曬腦。但事隔一年，S形不再。早前，媽咪姐喺銅鑼灣撞見小儀，着住鬆身衫嘅佢，睇落肥番啲，下巴亦由尖變番圓。見佢急急腳咁走來走去，以為佢約咗人，原來係撲護膚品。都好，keep 唔住S形，仲有白滑肌膚！
見小儀咁努力，拍檔森美亦好積極，操到一身肌肉，貼身衫一樣難唔到佢。上禮拜五（14日），佢同導演火火（李家榮）喺九龍城食完飯去攞車。見佢穀曬胸，唔知以為行緊catwalk！話曬去攞車都要行段路，咁樣穀法，好易缺氧喎。 ####
終於執到平嘢啦！（設計對白）小儀着住橫間鬆身衫，睇落去真係圓潤咗唔少，有啲師奶feel。
小儀掃貨宗旨係以最低價入貨，所以喺附近化妝品店車輪咁轉，終於俾佢以水貨價六五折掃咗一堆熟女補品—瑞士名牌Valmont呀！
瑞士名牌護膚品Valmont，出名抗氧化，關之琳、鄺美雲等大美人都用佢。
森美唔知係咪見多人望，行去攞車短短5分鐘，唔只擺chok樣，仲要穀胸，好鬼忙！
847期
