媽咪姐手帳
如果「雙英」同場會係點？星期二（18日），媽咪姐就去咗金鐘某大百貨嘅旗艦店開幕活動，為嘅唔係入冬新裝，而係親身望吓兩個未來特首嘅熱門人選，唐唐同梁振英呀！雖然我呢啲阿太無呢個「榮幸」去投票。但都好想講番兩句，同大家交流吓意見囉。
現場感受，唐唐真係有面，一嚟到，就有主人家潘迪生親自招呼，傾到笑曬。咦？有記者大聲追問婚外情同民望插水咩？聽唔到呀聽唔到，閃呀！
反觀喺港大民意研究計劃嘅最新調查顯示，得到29%受訪市民支持嘅梁振英（唐唐得14%咋！），就表現親民。慢慢行，企定定，等大家慢慢影！當然佢嗰個用心聆聽嘅手勢，都係象徵意義大於一切，最終無答過問題。但有姿勢無實際，總好過喺情感同面對大眾表現上都有缺失吖！你話係咪先？
特首騷之變臉
曾特首喺立法會有大班保安護駕，都揞住心口，話好驚啲手無寸鐵、得幾隻蛋嘅議員喎！咁去到公開場合，面對啲幾磅一支嘅咪牌，同十幾磅一部嘅相機，又會點呢？「出奇」地，識黑面、識笑，仲識冧笑㖭！演技呢家嘢，邊個話係明星嘅專利。 ####
唐英年快閃Vs親民梁振英
無花無假，唐唐真係企唔夠十秒就閃咗！梁振英就企足成半分鐘，由左面影到右面，由前面企到後面，聽曬在場嘅攝影師指揮，勁nice。
得戚
黑面
冧笑
847期
