媽咪姐
我哋係要年少無知！
2013年01月04日
啱啱過咗嘅元旦，媽咪姐好鬼忙，下晝同全港 13萬人齊齊上街，夜晚就去咗會展睇「叱吒」。係呀！我哋啲師奶仔都可以關心政治，但亦唔會放棄追星聽歌嘅樂趣喎！
之不過，睇咗成晚「叱吒」，喺嗰十首得獎歌入面，媽咪姐真係識得嗰一、兩首咋，陰功！鬼咩，諗真啲，政府遲遲唔肯發新牌， TVB一台獨大話曬事，四大唱片公司旗下歌手無得上電視宣傳。如果閣下只係睇 TVB嘅話，應該以為香港樂壇得番「巨聲幫」或者流住三色血嘅林峯同鄭欣宜㖭。所以話呢，就算匿喺屋企睇電視都避唔開政治，避唔開呢個視民意如無物、奉承中央同權貴嘅大話政府！
嗱，唔係媽咪姐自己講㗎，繼《天與地》成為 TVB頒獎禮嘅「最佳劇集」後，其主題曲亦橫掃各大音樂頒獎禮。喺「叱吒」頒獎禮上，當司儀宣布喺現場觀眾投票下，〈年少無知〉以大比數贏出成為「我最喜愛歌曲」，全場起立鼓掌。嗰種歡呼聲同眾志成城嘅感覺，幾咁振奮人心呀！呢啲，咪民意囉。媽咪姐同大家一路唱「不惜犧牲一切去上訴，權貴的想法太俗套」嗰陣，真係點滴在心頭！係呀，有人可能會話我哋 10度上街係傻嘅，不如瞓嚇晏覺好過。喂，歌都有得唱「如果命運能選擇」啦，個個都想有得揀㗎。不過呢個世界邊有不勞而獲！加油呀， this city is dying，但仲有我哋！
薛凱琪前後夾攻
緋聞男女方大同、薛凱琪（ Fiona）分別攞「男女歌手銀獎」。咦，方生對眼望啲乜？嘩！原來 Fiona搏盡，著咗件內藏泳衣嘅晚裝裙上台，仲前後一樣通透，睇曬！
王菀之嚇鬼
要突圍，未必靠衣裝！好似王菀之咁，搞個「倩女勾魂」妝一樣贏曬。 Well，好彩依家唔係 7月！
Eason玩殘自己
Eason以蒙面 look上台，但玩唔夠一陣，就頂唔順要除低！佢話：「嘩！又熱又焗，真係搵自己笨！」
祖師世紀合體
天後容祖兒果然「旺夫」，自己攞「女歌手金獎」外，仲旺埋師兄劉浩龍憑〈爛命鴛鴦〉攞到金曲獎。兩個人仲開心到喺慶功宴上，半推半就嚟個「世紀合照」！但之後又尷尬彈開，好搞笑。
.[忽然1周]我哋係要年少無知！
http://veryy8.blogspot.com/2013/01/1_7615.html.[忽然1周]我哋係要年少無知！
http://veryy8.blogspot.com/2013/01/1_7615.html
