2011年10月21日 星期五

[忽然一周.直接睇]唔開工攜子遊泰國 栢芝機場發爛渣




大封面

張栢芝今年8月正式與謝霆鋒簽紙離婚,兒子Lucas與Quintus由二人共同撫養。栢芝當時好有骨氣咁話唔要霆鋒錢,會努力工作養家。

沒有霆鋒做大靠山,栢芝近月的確強勢回歸影壇,早前連拍三片,穩袋4千萬,近日又為新戲《危險關係》在上海開工,其經理人更說栢芝每日都開工17、18個鐘頭,但記者上周連日在片場守候卻唔見栢芝蹤影。

本刊收到消息,指栢芝知道仇家章子怡唔開工,自己亦唔執輸,遂向劇組表示有急事要請假返港,但其實是鬼鬼祟祟在上周五(14日)帶仔秘遊曼穀三日兩夜。周日(16日),栢芝抱仔現身泰國曼穀機場,因不忿被記者踢爆行蹤而發爛渣,她還邊扯Lucas走邊向身旁的經理人大聲呼喝:「同我影曬佢哋(記者)放上微博!」惡女上身。



自98年出道,張栢芝一直負面新聞纏身,與經理人鬧不和、情變鬧抑鬱、淫照風波、婆媳關係惡劣、婚變貪錢等等。脾氣未好過的她每次被追訪,少則黑面,大則當街罵記者。

與死敵鬥請假

10月初到達上海為電影《危險關係》開工的栢芝,極力做其慈母,不時返港探仔。上周日(9日),她被影到約友人在大坑打邊爐,翌日(10日)已乖乖返回劇組開工。不過開工唔夠一星期,栢芝再度請假。

據知栢芝上周四(13日)向導演要求放假,周五已經唔見人。知情者說:「開戲咁耐唔係章子怡唔見人,就係栢芝請假。上星期四栢芝知道章子怡臨時話有私事唔拍得,栢芝隨即就話有急事,亦要返香港一日,但結果唔係放一日咁少囉!」

本刊收到可靠消息,栢芝急住放假,原來為做廿四孝媽咪,趁Lucas所屬的國際學校放中期假,帶埋Quintus一家三口首次同行出埠,去泰國曼穀玩。栢芝早有預謀地安排經理人Emily和另一女友人同行,而該女友人亦帶埋與Lucas年紀相若的小男孩,實行有個照應,Lucas又有伴齊齊玩。

據知栢芝上周五(14日)由上海飛去泰國,入住曼穀市中心地帶的五星級酒店。由於曼穀整個周末都在下雨,更面臨水災,原本打算帶Lucas到最愛的主題樂園都要取消,改去商場內的室內遊戲中心。

此外,栢芝此行還專誠到泰國一寺廟,誠心拜其近來篤信的「筍笛神」,她更花了近百萬元請了一座筍笛神像返家長期供奉,據講在家設有筍笛神壇,有助催旺姻緣,難怪剛失婚的栢芝對此神極為虔誠。

據知情者透露,栢芝本來安排了四日三夜的行程,「本來佢哋星期一先返,但栢芝唔想俾人發現佢帶Lucas去玩而唔返學,所以改早一日返港。」

嗌咪催上機

周日(16日)下午5時,本刊發現栢芝經理人Emily率先出現曼穀機場準備,代栢芝等人check in。Emily一人推住三大個行李喼在check in櫃台前周圍望,又用手機影低懷疑是記者的途人,行為極度怪異。Check in後她步出機場登上一架早泊在上落客區的七人車,着司機駛前約五個車位再停下。此時Emily一馬當先落車,栢芝緊隨其後,並抱起車內的Lucas放入BB車內,Emily則負責抱Quintus,栢芝友人亦抱着小男孩下車尾隨。

一行六人一支箭衝入出境閘口,海關見她們如此狼狽,即安排她們行另一免排隊的通道。順利過關後,眾人匿在機場貴賓室等候上機。栢芝乘坐下午6時20分起飛的國泰CX702號班機返港,但眾人竟然6時15分仍未出現登機閘口,直到地勤人員開咪作多次最後召集,栢芝才一手抱住Quintus,另一隻手拖住Lucas施施然出現。本來面對友人仍有笑容的她,一發現記者即黑面神上身,喝令經理人Emily說:「佢哋記者嚟㗎,影低佢哋啦你!」正跟地勤職員處理BB車擺放問題的Emily,被栢芝一喝亦要馬上照做。上機後,記者見栢芝不顧乘客守則狂打電話,似為call人接機作好準備。

度橋做苦主

抵達香港機場後,栢芝快步走到行李帶,先吩咐Emily等行李,自己則忙於打電話。甚勞氣的栢芝與電話中人說:「你哋嚟曬未㗎?依家攞緊行李,好快就出嚟,你哋盡量擋啦!叫架車stand by呀!」

由於被踢爆唔開工遊泰國,栢芝上機前已call定助手兼死黨Andy和契細佬化妝師Will前來「迎戰」。一手抱住Quintus,一手拖住Lucas的栢芝,出閘後一見記者即

黑面,記者只在遠處拍照已被她喝罵:「你哋好冇禮貌囉!」記者不停向她說「不好意思」,請她無需如此急步走。但以一對仔作擋箭牌的栢芝充耳不聞,繼續話記者冇禮貌。

栢芝十問九唔應,記者轉向笑容滿面的Lucas,問他:「去泰國好唔好玩?有好多玩具喎!」被栢芝扯到氣喘的Lucas笑住答:「係呀!」Lucas大膽答問題,栢芝即喝停他:「Lucas唔好答問題!」三母子成功上車後,栢芝的隨從即聽從主人指令,用手機360度影低記者容貌,而Emily更一度挑釁記者。

翌日,栢芝向其相熟報章發相自揭遊泰國一事,同時亦着經理人在微博怒罵記者粗暴對待她們,但就隻字不提向上海劇組隱瞞遊曼穀一事。

惹劇組不滿

事實上,難怪栢芝發爛渣黑面,皆因日前她和鄭伊健的緋聞傳出時,經理人Emily還聲大大話栢芝每日都開工17、18小時,可惜被本刊踢爆她帶仔旅行,東窗事發。

本刊記者上周曾到上海《危險關係》影棚採訪,屢傳不和的章子怡和張栢芝一齊唔見人,而同場就有工作人員向記者訴苦:「我們先後搭蓋了這個大屋場景好幾次,蓋好又拆掉,全都因為兩位大姐會到來拍攝,但最後又不出現。她們互相鬥大牌,結果拖累整個劇組。開拍已有兩星期,但實際只拍了三天。男主角(張東健)容易控制,只是章小姐與張小姐有問題。」

栢芝呢位性格演員鍾意幾時開工就幾時開,加上近日有傳她已穩袋加盟新亞洲娛樂的一億酬金。難怪阿姐繼續我有我自由,唔理你感受。至於忙於在台灣拍新劇《下一個奇迹》的謝霆鋒,雖則話與栢芝共同撫養一對仔,但實則對囝囝的行蹤都管唔到。本周三晚(19日),記者就栢芝唔開工外遊一事,致電她國內經理人餘毓興,他着記者一小時後再致電他,但其後一直沒再接聽電話。

本周二(18日),記者問過身為Lucas與Quintus嫲嫲的拉姑。對於幾個月冇見一對孫仔及知否他們遊泰國,她亦無奈說:「佢(栢芝)先係兩個孫嘅阿媽,佢自己揸主意囉!」月底就是拉姑60歲大生日,開曬口恨見一對孫仔的她,相信能否如願都要先過栢芝呢關。

栢芝四大隨從

張栢芝每次出入都好似皇帝出巡一樣浩浩蕩蕩,佢班隨從各有各嘅工作崗位,有經理人、助手、髮型師、保鑣等,個個身懷絕技,簡直勁過《荃加福祿壽探案》嘅主角。

今次本刊記者禮貌兼有距離地正常採訪張栢芝,身在現場護駕的經理人Emily,就在微博話記者貼住小孩的臉拍照,吹水功勁過李思捷。其實做栢芝嘅隨從工作量確唔少,除了現場護主及反拍記者外,返到屋企仲要即時將照片圖文並茂放上網,再加少許文字創作寫好張栢芝,唱衰記者。不過最近好似唔見咗栢芝細佬豪龍,即係少咗個保鑣。

野蠻栢芝事件簿

栢芝嘅狂野率直性格,大家都唔會陌生,就連曾經共枕嘅霆鋒都講過:「我老婆係咩人我好清楚!」擺明有隱喻。

瑞士報警鎖記者

今年6月尾,「鋒芝婚變」吸引各大傳媒追訪,有記者追訪栢芝到瑞士,她即時向當地警署報案,令警方相信事態嚴重,派出兩名便衣扣查採訪的記者。見記者被手扣扣住,栢芝惡形惡相笑住用手機影相:「你哋好肉酸囉,我實擺上微博㗎。」

迪士尼鬧途人

今年9月,栢芝同Lucas去香港迪士尼玩,有途人舉機拍照,栢芝即大聲痛罵該名拍照男子,命對方即時刪除照片,更驚動樂園護衛。該名男子的太太不甘老公被罵,將栢芝「真面目」公告天下,在BB網站「親子王國」討論區聲討張栢芝,不過討論區板主為免多事,隨即刪除了該言論。 ####



獨家踢爆

被本刊踢爆唔開工遊泰國的栢芝扯住Lucas愈行愈快,記者問Lucas去旅行好唔好玩,拎住玩具的Lucas話:「係呀!」栢芝即同Lucas講:「唔好答問題!」

扯實Lucas



10月16日 曼穀機場

周日(16日)張栢芝結束三日兩夜泰國之旅,坐酒店專用七人車到達曼穀機場,乘搭下午6時20分班機回港。到最後一分鐘先肯上機的栢芝,在候機室指住記者向經理人Emily怒吼:「仲唔影佢哋!記者嚟㗎!」



抵港忙部署

栢芝抵港後吩咐經理人去等行李,自己則行埋一邊打電話,叫前來接機的助手及好友全力阻擋記者鏡頭,其間Lucas周圍走冇王管。



出閘狂奔

栢芝出閘後右手抱Quintus,左手拖住Lucas,急步向停車場方向快行。本刊記者上前請她慢下來拍照,點知栢芝加快腳步,劈頭第一句就怒斥記者無禮貌,但跟住媽咪快行的Lucas就笑笑口。



人牆護駕

由出閘開始,栢芝堅持自己抱一個拖一個,極力表現自己好辛苦,仲要被記者追訪。記者當時作正常的採訪,栢芝身邊有經理人、助手同契細佬護實,記者同佢一直保持一段距離,想埋身都難。



Lucas做親善大使

栢芝全程黑面嬲咗成村人,Lucas反而做咗親善大使。栢芝契細佬Will抱Lucas上車,Lucas仲對記者笑笑口,真係好可愛。





反影記者

栢芝上車後,經理人Emily、助手Andy及契細佬Will即以手機逐個捉反拍記者,Emily仲對記者說:「我哋就成日上鏡,你哋唔上鏡嘛!」態度極具挑釁性。



助手Andy



拉姑冇符

本周二(18日)下午4時許,拉姑去銅鑼灣利園嘆茶,問佢知唔知栢芝帶兩個仔去泰國玩,拉姑沒好氣說:「佢(栢芝)先係佢哋阿媽,佢自己揸主意囉!」睇嚟拉姑都係唔多知情。

佢(栢芝)揸主意囉!(真實對白)



泰國機場直擊 鬼祟check in

周日(16日)下午5時,栢芝經理人Emily先出現在曼穀機場國泰航空的商務客位counter,見她行色匆匆,不時四周張望,之後才拿出幾本護照check in。



Emily代栢芝辦妥check in手續後,返回機場外的上落客區,通知一直匿在七人車內的栢芝。未幾栢芝抱住Quintus下車,同行還有女友人及其3歲兒子。



栢芝把Quintus交給Emily代抱,自己推住坐在BB車上的Lucas。隨身行李就交由一名地勤人員負責推,原來明星係有特權,最後一分鐘至入閘,亦有地勤人員貼身服侍。



霆鋒台灣忙搵錢



懶理前妻緋聞

離婚後的謝霆鋒,全情投入工作賺錢養仔。對於栢芝的新聞,他都不願回應。早前有記者問他有關栢芝與伊健的緋聞,他只揮手冷笑一聲。電視圖片



四哥探班

霆鋒正身在台北趕拍電視劇《下一個奇跡》,日前謝賢及婷婷都有去探班。當日大隊在彩虹河濱公園取景,四哥全程陪實,兩父子仲趁空檔一齊打棒球。電視圖片



栢芝努力營造好媽媽形象,但早前安排Lucas客串電影《無價之寶》飾演她與伊健的兒子而被抨擊,最近她還與伊健傳緋聞。



Lucas成日跟住栢芝周圍飛而唔返學,栢芝因而被指不負責任。今年開學,栢芝親自湊仔返學,力挽形象。《蘋果日報》圖片



死敵大鬥法

十年前已結怨的張栢芝與章子怡,上月26日在北京出席電影《危險關係》開鏡記招,在台上接受訪問時零交流。電影開拍快大半個月,兩人更鬥大牌唔肯埋位,咁搞法導演都幾頭痕。《蘋果日報》圖片



《危機關係》首日開鏡拜神,章子怡突然甩底,得栢芝同男主角張東健出現。兩女有你冇我,不和早已升級。



栢芝大屋



上海場景一改再改

本應身在上海拍《危險關係》的栢芝,突然請假唔開工。劇組人員本來為她搭建好的大屋場景亦因為主角唔拍而要拆走。



拆景





歪曲事實

周日本刊記者影到栢芝遊泰國後,栢芝翌日即發相給相熟報章自爆攜子外遊。其經理人Emily與助手Andy亦先後在微博發功,歪曲事實鬧記者。



鬧fans

早前有fans影到栢芝一拖二出街,fans將相上載微博,點知俾佢經理人Emily誤當狗仔隊,照鬧!



反拍記者

栢芝最鍾意叫隨從反影記者然後放上網。



圖片




847期