媽咪姐手帳
早幾日，媽咪姐趁得閒，就去清水灣鄉村俱樂部行吓，呼吸吓新鮮空氣，順便探吓城城。做咗聯合國兒童基金會大使嘅佢，有愛心又有活力，明明同劉華、梁家輝趕拍緊《寒戰》，瞓得三粒鐘，但仍然精神奕奕！更厲害嘅係，面對「巨人」嘅挑戰，依然毫無懼色！
無錯，仲係靚女巨人，講緊嘅係身高1米85、世界排名14嘅美籍韓裔高球手魏聖美（Michelle）。望吓啲相，佢真係高過1米7（此乃官方網頁資料）嘅城城成個頭咁多。不過Aaron抬頭仰望無頸痛，仲好主動咁笑曬同靚女傾偈㖭！咦，係喎，唔記得咗熊小姐都身高1米79。慣曬咯。 ####
再低啲啦， 乖！（設計對白）
呢張相，好鬼似小學陸運會嘅頒獎情形。只差在，韓國靚女魏聖美無踏上頒獎高台，已經要彎腰接受城城送上嘅花環，畫面真係幾funny！
企直再度高，城城同魏聖美真係似嚟自唔同嘅國度。望真啲，靚女其實都刻意彎低少少，好識做。
魏聖美只識英文、韓語，但咁都無阻城城同靚女溝通。係喎！除咗熊小姐，城城仲有個生得唔矮嘅異族好朋友，叫藤原紀香。
847期
