2012年11月21日星期三

[FACE]喬寶寶　做好小醜係一種成就

喬寶寶係尖沙咀重慶大廈地膽，任何人要喺重慶入面拍嘢或者要大量南亞裔臨時演員，喬寶寶都會幫手吹雞！

搜尋氣

喬寶寶　做好小醜係一種成就

2012年11月21日

憑《殘酷一叮》入行嘅印裔喬寶寶（原名喬保羅），喺香港土生土長，又在無綫捱足 7年由路人甲做到《衝呀！瘦薪兵團》擔配角。現時坐擁兩間餐廳、一間單車鋪，本月底仲會在九展開 3場棟篤笑。做親都係小醜，但他仍驕傲：「氹得人開心都係一種成就啫！」

喬寶寶為照顧現居於蘇格蘭、不幸患上先天性脊椎神經問題及過度活躍症的細仔，下年 8月被迫舉家移民去蘇格蘭，但他仍堅持三年後一定會回歸重新開始。

我喺香港土生土長，我係印度裔啫，我好 proud of呢個身份喎！人哋叫我哋做阿星、阿差，其實香港人都係人講佢又講，唔好咁介意啦。最侮辱嗰次？唔想提喇，呢啲人同其他害群之馬一樣好快有天收。

喺 TVB做咗 7年，佢哋咁多人，唔一定要搵我，但我都有好多綜藝節目做，又有劇拍，《衝呀！瘦身兵團》仲可以拍住陳展鵬、阮兆祥，仲想點？做人最緊要知足，做小醜有乜所謂，喜劇好難做㗎，我氹得人開心都係一種成就呀！

因為我個細仔有病（先天性脊椎神經問題）喺蘇格蘭住，所以想太太攞本特區護照，咁樣可以免英國簽證入境，點知佢哋（入境處）唔批，我咪惟有全家移民去蘇格蘭囉，我𠵱家賣曬香港啲鋪頭同樓喇！我太太喺香港住咗 22年，我覺得香港班官冇人情味囉，戴住有色眼鏡睇我哋呢啲非中國裔人。我哋唔怕喎，我冇嘢叻，淨係唔怕辛苦，勤力一定有回報，到時同老婆坐完移民監，咪再返嚟香港重新開始囉，我始終最愛都係香港！

放大圖片