面對面
悲傷啟示錄 關心妍
2012年11月21日今年是關心妍入行第十年，年頭開了紅館個唱、最近推出年度大碟《 Pause》，不到三個星期已經銷量過萬，〈失戀哲理〉更有望爭無綫金曲金獎，事實證明，賣足十年，關心妍的招牌慘情歌依然叫座。
04年的事業低潮一早捱過， 09年嫁給金融才俊楊長智亦幸福美滿，篤信基督教後致力義務工作，今年九月更榮獲十大傑出青年，很多人不明白，關心妍為甚麼還要唱慘情？
「轉歌路唔係未試過，上一隻碟《在你名下》就係唱幸福，大家口講話好得意，但係事實上，銷量欠佳，卡拉 OK冇人點過……」除了商業角度考量，關心妍說，唱慘情歌比唱勵志歌更能鼓舞人心，這是從她自己 33年以來並不平坦的人生路上歸納出的真理：「最低潮時，同佢講加油振作係冇用㗎！要幫到佢，一定要陪佢一齊喊，等佢自己走出嚟……嗰種心情，我最明白。」
悲傷的時候，聽到唱歌的人比你更撕心裂肺，的確有可能覺得自己還不是最慘那個。關心妍的一席話，聽起來，有點道理。
低潮換來的傑青
今年 9月 30日， 2012年度香港十大傑出青年頒獎典禮中，有兩個是藝人，王祖藍和關心妍。 99年奪得加拿大新秀歌唱大賽總冠軍， 02年入行，頭兩年是關心妍在娛樂圈最順風順水的日子。想不到極速在兩年內唱進紅館、攀上事業高峰，上得快、落得更快，三個月後已經一沉百踩冇工開。關心妍說，獲得傑青榮耀，一切要從最低穀說起。
一個人行緊運時，見到所有嘢都好似好靚好美好咁。但係當身處低穀，你會覺得連自己呼吸每一啖空氣，都有錯。兩年之嘛，我可以入到紅館開騷，嗰陣時我年紀好細，上到一個咁好嘅位，只想繼續衝繼續上，但係突然間，衰無過犯，面目可憎。嗰陣時我終於明白啲有錢人破產係咩心態：本來有好多錢，一夜之間口袋一個崩都冇剩；本來一行出嚟，至少有七、八個人跟身，一夜之間全部走曬，剩番我一個。嗰段日子，冇工開、電話全日都唔會響一次，我想撈，但無可，根本冇人想見到我，打畀人搵嘢做，個個都 hea我：「問嚇先啦……」嗰下我體會到呢個世界係咩一回事，原來冇人想你好。原來你好嘅時候，個個都想睇嚇你幾時死。到你衰，個個都想踩多你幾腳，想你快啲死！
人去到呢啲時候，冇人幫到㗎啦，一定要靠自己行出嚟。嗰陣時，我開始信基督教，冇工開，就去做義工，每個星期六、日風雨不改，一直堅持到 𠵱家。冇錯，我係慘，但係當我遇到比我更加慘、更加需要幫助嘅人，再望番自己，算得係乜？我試過對住一個十幾歲就冇咗一隻腳嘅男仔，仲正面過我，仲話第二日要去打籃球，於是我問自己，畀你揀，關心妍，你係想冇咗隻腳定係冇咗事業？
以前，事業就係我全部，我想搵錢想做天後、想做最受歡迎女歌手； 𠵱家，唔會囉……講真，我 𠵱家唔使靠唱歌一樣生活得好好，繼續唱，係因為我搵到自己做歌手嘅另一層意義，原來歌聲真係可以幫助人，原來知名度真係可以幫人籌錢幫人得到關注。
從小就沒有家庭日
關心妍說，她不是別的女孩子，戀愛大過天，事業放兩邊。六歲父親就拋妻棄子、十二歲就和哥哥兩個在溫哥華自生自滅，關心妍說，當年事業就是自己的全部，因為沒有錢就沒有安全感，從小就預了自己要像媽媽一樣，靠不了男人一輩子靠自己。
爸爸由我六歲嗰年就離開屋企，從此再無聯絡。就算係六歲之前，我對爸爸嘅回憶都近乎零。可能係佢從來冇畀過啲咩溫暖同關愛我，亦都可能係好唔快樂，所以我特登刪除咗有關爸爸嘅所有回憶，六歲之前嘅嘢，有時我諗極都覺得好模糊。爸爸走咗冇耐，媽咪帶住我同哥哥移民溫哥華，喺嗰邊陪咗我哋兩年，實在搵唔到食，媽咪一個人返香港做嘢，留低我同大我歲半嘅哥哥喺嗰邊自生自滅。
以前，我屋企已無家庭日，跟住屋企就剩番我同阿哥兩個，溫哥華嘅鄰居掛名叫做監護人，實情唔多會理我哋，十歲開始，我就要自己煮飯、自己洗衫，照顧埋阿哥。一開始連英文都唔識，食飯啲錢俾人偷咗，唔知點同洋人老師講，又唔敢打返香港煩阿媽，成日都要捱餓；放學嗰陣，個個爹哋媽咪開車嚟學校門口接，睇住啲同學好開心咁跑去搵爹哋媽咪，真係好羨慕，好想都衝過去攬埋一份……成日都要提醒自己：唔係你㗎，你係冇（爹哋媽咪接放學）㗎啦，跟住同哥哥拖住手，行半個鐘路行返屋企。
其實一切過咗去，我又唔覺得我哋有幾慘，仲有媽咪錫喎！又可以訓練到早啲獨立呢！我從來唔覺得欠缺父愛，成長經歷淨係令我覺得做女人，就應該似媽咪咁，獨立、硬淨，要做女強人；我覺得最慘係哥哥，少咗一個有威嚴又顧家嘅父親做榜樣，到 𠵱家結咗婚做咗爸爸，都係溫柔體貼型，哈哈！
終於不用逞強
09年 10月，關心妍與年長五歲、拍拖兩年的楊長智在印尼峇里島舉行婚禮。唱慣慘情歌，關心妍說，其實自己事業心重，事業穀底比失戀心痛一百倍。在遇到楊長智以前，一直覺得愛情和婚姻靠不住，現在，卻無法想像失去老公楊生一分鐘。
媽咪婚姻失敗，我由細到大都覺得男人係善變嘅動物。呢分鐘，你愛我，你梗係話乜都得啦；下分鐘，可能已經走得無影蹤。所以對我嚟講，無嘢重要得過搵錢，因為我預咗自己一世都唔會結婚，每次拍拖我都過得一日算一日，男朋友一同我講將來，我就有懷疑，刻意避開話題。
十歲開始，屋企就係我掌管，買餸煮飯個個月阿媽寄嚟嘅錢都係我分配，我未試過俾人照顧，所以大個咗，拍拖都愛爭畀錢、重嘢慣咗自己拎，我唔識俾人照顧、亦都唔敢畀自己依賴人，直到我遇上我老公……咁大個人，第一次唔使自己撐，可以交畀人哋去愛錫自己，享受做女仔嘅特權，試過先至知，原來個感覺咁好㗎喎。將來嘅嘢我真係唔敢講，但係老公係我咁大個女第一次遇上一個人，可以放心去愛，去依賴，已經係最幸運嘅事。
小毛驢的故事
訪問末段，關心妍說了一個故事：「從前有一個小毛驢，佢唔好彩踩咗落個井度，井出面嘅人唔只唔救佢，仲係咁掉嘢落井想掟死佢。小毛驢本來都覺得個世界好唔公平、個個都不安好心。結果個個都掟嘢落井，廢物愈積愈多，小毛驢慢慢就醒覺，原來可以踩住佢哋做梯級，最後終於搵到上返地面嘅出路。」
回到現實，小毛驢是關家姐，爬出地面應該意指嫁得好又當選傑青。落井下石，原來才最勵志。
.[FACE]悲傷啟示錄 關心妍
http://hk8news-e.blogspot.com/2012/11/face_8406.html
