自取滅亡
曾經被控藏毒，判處感化令的周永恒，一度前路茫茫，○五年信耶穌後洗心革面，第二年以幕後人身份入職無綫的子公司「TVB Music」做音樂製作，並不時參與佈道會講見證，生活重回正軌。數月前，周永恒忽然被無綫以態度不合作為理由解僱，據了解，背後真正「死因」，與去年中他爆樂易玲愛將、「TVB Music」的音樂總監鄧智偉大鑊，指對方數目不清有關，敢於「舉報」的周永恒，被秋後算賬。
包庇下屬
與林峯分屬好友的鄧智偉，即使被周永恒「舉報」劣行，但因有高層包庇，繼續受器重，為無綫的劇集作曲及任監製外，樂易玲更將他轉到自己管轄的藝員部，攬到實。反之，睇唔過眼要出聲的周永恒，則硬食「炒魷」！「鄧智偉係阿Roy（周永恒）上司，但份人好忌才，見下面啲人嘅作品反應好，一係㩒，一係就改幾粒音，然後就加埋自己個名，當係兩個人作。無綫作曲費三千蚊首歌，佢話咁易分人一半，連CASH版權稅都分一份。阿Roy同其他音樂人好似譚天樂、葉肇中，成日俾佢咁樣『食歌』，不過大家都知佢係樂小姐心腹，所以大多數人都忍，只係阿Roy夠膽出聲。點知就咁俾人整走，都幾唔抵。」知情者說。
有利益衝突
記者向周永恒求證他被炒一事，他一臉無奈，但對因為挺身投訴鄧智偉，搞到工都無埋卻不感後悔。「佢『食歌』係有咁嘅事，而且經常發生，好唔尊重其他人。佢係音樂總監，有權揀用邊間錄音室，奇在外面有租金同價，但錄音設備更好嘅錄音室佢唔揀，偏偏揀設施麻麻嘅Six Studio嚟用，後來先知間studio係鄧智偉嘅，雖然佢搵老友袁卓華出面，但行內人都知佢有份，咁即係左手俾右手，啲數點開，唔使講啦，我亦唔方便講。「我有勸過鄧智偉唔好咁做，但佢唔聽，我咪同佢上司樂易玲講囉，當時鄧智偉亦在場。點知樂小姐聽完講咗句：『咁樣有問題咩？』我反問番佢：『咁樣都無問題咩？』佢無出聲，之後我就俾人雪藏，間Six Studio亦即刻冚旗。」
曾在TVB Music工作過的歌手陳詩慧，據知亦知道周永恒因爆鄧智偉大鑊而被炒的內幕。記者求證她，但她不欲多言：「確係有咁嘅事，我都好同情阿Roy，但我同TVB仲有約，所以唔方便透露！」
隱瞞發警告信
說到被秋後算賬，周永恒開始激動。「今年三月我返公司攞糧單報稅，當時佢哋俾咗兩份嘢我，一份係去年底鄧智偉指我態度唔合作嘅評核報告，但我無睇過亦無我簽名就上報去人事部，另一封係今年一月向我發出嘅warning letter，但我從來無收過亦無人通知過我。人事部只係話鄧智偉同佢哋講一直搵唔到我，真係好笑，嗰段時間我上過《心有靈犀》同《Big Boys Club》做節目，我老婆（前名趙頌茹）都上過《魔法擂台》，點解人哋搵到我哋佢搵唔到，根本有心整我！之後我有call鄧智偉，但佢唔敢覆我，到五月TVB就話炒我！」
被無綫炒魷半年，周永恒說唔想再有下一個受害者，所以選擇公開真相。
記者致電鄧智偉，但截稿前未有回覆。
林峯老友
炮製「炒魷」餐回贈周永恒的鄧智偉，00年與王勝燊、袁卓華以組合Primary Shapes加入樂壇，其後加入TVB，成為正視音樂的音樂總監，作品逾300首，當中大部分都是與其他音樂人合作，例如觀眾耳熟能詳的《獎門人》主題曲，便是周永恒、陳詩慧與他合力創作。近年唔少TVB劇集主題曲，例如關菊英《講不出聲》、徐子珊《Hit Me》、林峯《Let's Get Wet》等均出自他手筆。 因為與樂易玲的關係，鄧智偉與林峯亦相當老友，由推出專輯，以至演唱會上的鋼琴伴奏，皆由鄧一手包辦。 ####
本週日(二日)，周永恒返教會時被追問無綫炒魷一事，他直認是因挺身指證樂易玲愛將而遭受迫害。
林峯唱片大賣，在慶功宴上樂易玲攬住幫他做唱片監製的愛將鄧智偉(左)影大合照。
在無綫月薪數千的周永恒，近年主要靠在佈道會獻唱及講見證的酬勞收入，養妻活兒。
周永恒爆完大鑊，今年一月TVB Music便以工作表現不理想，給他警告信，但離奇的是此信一直只放在TVB Music內部，沒有通知當事人，擺明有人玩嘢。
（《蘋果日報》圖片）
1127期
