探熱針
電視茉莉花革命，無綫立立亂，加上「城市電訊」主席王維基趁亂挖角，無綫積極加薪留人，打鑼急開○四年經典劇《金枝慾孽》續集挽聲勢。監製戚其義碌盡人情牌，保住原班陣容，由陳豪、鄧萃雯、佘詩曼及新加入蔡少芬做膽，不過，在第一集結果中箭負傷逃離紫禁城，跟陳豪有感情發展的張可頤，卻因脾氣臭得罪人多，被舊班底嫌棄飛出局，至於近年搵慣「人仔」的林保怡，亦玩嘢開出收二十萬一集，戚其義無能為力，唯有同二人講拜拜。
臭脾氣捱打
做好準備，迎接明年免費電視大戰，無綫週一晚（十月十日）高調為來年重頭劇《金枝2》拍宣傳片。黃昏六點，陳豪，鄧萃雯，蔡少芬，苟芸慧等準時出現將軍澳電視城化妝間；七點半，大家陸續入廠，但被誠邀回巢救亡的鄧萃雯，卻因為人手不足，遲遲未分配到人為她化妝梳頭，呆等個多小時，令如妃面都黑埋。受命打硬仗，監製戚其義為開續集碌盡人情牌，除了阿佘身在外地開工，趕不及歸隊外，在宣傳片中出現的演員十居其九都是新一集的陣容，黎姿嫁人唔撈，生完的蔡少芬入局，但同是第一集女主角張可頤，卻因當年扮阿姐得罪人多，被飛出局。「當時幾個女仔都好想突出自己，但俾人讚好戲嘅可頤直情當正自己係阿姐，成日教其他人做戲，最難頂係佢少少嘢都睇唔過眼，即刻黑面，好似大家一齊等埋位，佢唔鍾意就發脾氣，搞到啲氣氛好差，連阿戚都覺得佢麻煩，所以今次拍續集，亦一早決定唔用佢。」一名工作人員說。
獅子開大口
叮走張可頤，對身價突然狂飆到一集收二十萬，一個崩都唔肯減的林保怡，戚其義亦唔再留戀。「佢（林保怡）當正自己拍緊大陸劇，竟然開二十萬一集，如果《金枝2》拍三十集，單係佢嘅酬勞就要六百萬，無綫邊可能會出到咁嘅價。其實保怡冇理由唔清楚公司嘅作風，咁玩嘢法，都係要無綫死咗條心，唔好再搵佢。」無彎轉，仍在修訂劇本的戚其義索性作出改動，將戲份加到自己友黃德斌身上，唔阻林保怡發達。
全國冠軍
04年推出的經典劇《金枝慾孽》，收視平均高企32.5點，大結局更創下41點成績，成為當年收視之冠。《金枝慾孽》不但獲選為當年最佳劇集，更橫掃04年度《萬千星輝頒獎典禮》多個獎項，林保怡、黎姿雙雙封視帝視後，陳鴻烈、鄧萃雯亦奪最佳男女配角。此外，亦獲港台頒發「電視欣賞指數」最佳電視節目第三位，足見其受歡迎程度。06年《金枝慾孽》於湖南衞視播放，更成為全國收視冠軍，帶挈一眾演員知名度急升，頻頻返內地搵真銀，TVB早前在深夜時段翻炒重播，亦吸引大批電視迷唔瞓煲劇。 ####
蔡少芬雖然話未正式落實係咪演出，不過鄧萃雯就早已爆響口話度期同阿戚合作《金枝2》。
《金枝2》連續兩晚拍巡禮宣傳片，知道要拍通宵，在第二晚出現的陳豪已經有所準備，帶定私家茶提神。
《金枝》第一集，張可頤中箭唔死，林保怡亦未見全屍，個故事雖然有得發展，不過阿戚決定兩個冇得留低。
有指阿佘轉戰內地搵真銀後，接拍港劇已經興趣不大，加上《金枝2》劇本未出，阿佘回娘家助陣機會仍是五五波。
監製阿戚跟黃德斌合作過多部電視劇，今次阿戚捧聽話自己友亦順理成章。
黎姿嫁人做富貴馬太後，既要照顧孖女，又要睇住細佬，冇可能再復出拍續集。
阿戚有自己慣性班底，不過跟張可頤合作過《金枝慾孽》嫌對方麻煩，已經冇咗合作，○九年拍《天與地》大製作時，除張可頤外，舊班底都有得留低。
04年《金枝慾孽》
1127期
