國台扮
隋棠去年憑《犀利人妻》人氣爆燈，姚元浩亦憑《新兵日記》捱到上一線，雙雙事業有成反而鬧分手，證明患難與富貴，並存有難度。
突然分手
港產黃金剩女接連出嫁，台灣三大名模白歆惠、隋棠同許瑋甯，感情生活反而出現莫名其妙變化。
先講白歆惠，上個禮拜突然宣布同籃球好手毛加恩7年情玩完，問佢點解分手？又瘦咗一截嘅白白，居然唔識答，睇番佢微博，上個月初已經有所暗示：「原來我沒有想像中那樣堅強！」
過往同毛加恩鬧過兩次分手，大約冷戰一個月就無事。今年五月，女方擲5,000萬台幣買下天母區豪宅，八月，再同毛加恩去美國度假，全城睇好「白毛戀」修成正果，點知過唔到7年之癢大關。
至於同樣捱唔過7年之癢，仲有隋棠。今年四月，自爆同電視台小生姚元浩分手，有傳與女方逼婚不遂有關，但半年後，兩個因為屋企三隻狗而復合。
姚元浩淩晨收工，與同事食完消夜返歸，校啱時間，隋棠離開屋企坐的士會情郎，兩個一見面就拖實上樓。
隋棠、白歆惠同屬一間模特兒公司，既然大家係同門師妹，真係要好好交流一下7年之癢成功與失敗心得！
難言之隱
事緣上個月初，隋棠憑偶像劇《犀利人妻》入圍金鐘獎視後，姚元浩第一時間致電關心講恭喜；之後隋棠要出門一段長時間，於是交低屋企鎖匙，叫姚元浩上門幫手餵狗……之後故事發展大家都估到，仲好快俾人影到手拖手返男方屋企過夜。7年止癢，隋棠大方承認：「有點像剛萌芽的戀情那種感覺，希望可以往好的方向走。」據聞兩個有意明年拉埋天窗。兩大名模，有幸有不幸，同金馬影帝阮經天拍拖4年嘅許瑋甯，日前突然有感而發：「其實4年就是一個關卡。」小天片約一部接一部，家陣响國內同餘文樂拍陳可辛嘅《血滴子》，唔通聚少離多出咗問題？許瑋甯諗咗一陣先答：「沒有！」有難言之隱？「我是怕回答太快，你會以為我說謊啦。」之前阮經天接二連三俾人發現攬女上酒店，許瑋甯仲要企出嚟撐男友，有苦自知，但最難捱係明年二月，阮經天要入伍當兵一年，呢個關卡，先係關鍵。 ####
（台灣《蘋果日報》圖片）
阮經天性史多籮籮，試過俾前女友公開爆性癖好，奪去前組合成員劉品言初夜後完唱，仲有攬金毛辣妹（上圖）上酒店房，講真許瑋甯都幾忍得！
今年盛傳白歆惠會同毛加恩拉埋天窗，點知突然宣布分手，白歆惠冇交代原因，只係強調同第三者無關。
1127期
