名氣生活
從事珠寶生意的樂壇天後陳慧琳父親陳崇偉亦是識歎之人，男士們最喜歡的車、酒、手錶，他對酒最感興趣，一直飲開紅、白酒的他，最近開始學飲威士忌，「我都係啱啱學咗年幾咋。」
自言是「新牌仔」的他推介威士忌的好處，「佢唔同紅酒，紅酒一開就要飲曬，但係威士忌可以擺幾個月都得，分開幾次飲都得，每支酒味道距離都好大、有好明顯嘅分別，你會覺得好interesting。」而且他覺得威士忌易打理，可以放在任何地方，相對存放紅酒的方法卻麻煩得多，「紅酒一定要保持十二至十四度左右，又要濕濕哋，哎呀，唔好搞啦。」雖然只是新手，但陳崇偉與朋友已收藏了三十多支威士忌，如此熱衷，買酒應該冇乜睇價，他說最貴一支是六萬多元，「我哋買得好穩陣，太貴去到十幾廿萬當然唔會買，同埋都係自己去source返嚟，上網睇、又會叫朋友喺外地拎返嚟，感覺好似尋寶，呢個就係最好玩嘅地方。」問到飲酒心得？他笑笑口話：「冇㗎，最緊要係relax同enjoy。」
專家教路
第一：放鬆。緊張的話，便品嘗不到真正的味道。第二：首啖淺嘗，因威士忌的味道非常強烈，舌頭會被「嚇親」，待舌頭適應了，再呷第二啖便會品嘗到真正的味道。第三：忌加水或冰。如吃東西一樣，調味料會掩蓋了原味。第四：切忌搖酒。威士忌跟紅酒、白酒不同，搖酒時會使它的味道都揮發出來，會混亂了酒味。
唔揸跑車
至於揸車他亦同樣追求舒適享受，「喺香港揸開篷車，夏天咁熱根本頂唔順。」他坦言曾經愛揸跑車追求速度感，「我都揸過一、兩年快車，嗰陣揸Porsche，要特登去大埔嗰條路先可以享受到速度，所以玩玩吓都冇玩，賣咗架車算啦。」陳崇偉說現在揸番「正常車」，即係穩陣舒服的平治房車，「男人會鍾意速度感，但到我呢個年紀，比較鍾意揸安全、穩陣啲嘅車。」 ####
陳崇偉說在家少有飲酒，「成日飲唔得㗎，多數同朋友喺出面飲。」
試酒時，他細心研究紙上的威士忌資料，因五杯酒均來自不同產地。
問他試車的感覺，他說：「好好，但係香港啲路都開唔得快，我頭先都快唔到。」
1127期
