滾熱辣
國民教育 娛圈兩派互片
2012年09月07日
國民教育教出個大頭佛，搞到學生絕食、示威，辣㷫全城，更辣㷫娛樂圈。娛圈不少星爸星媽，不論子女讀國際學校抑或平民中小學，大部分反對國民教育，鄧梓峰更直指：「荒天下之大謬！」不過，出身於傳統左派學校「香島中學」的苗僑偉及何守信，以及在國內成長的楊小娟則力排眾議，不約而同力撐「國教」。「左派」與「反國教派」舌劍唇槍，咬實唔放！
不少市民帶埋細路從維園遊行到政府總部，齊齊反對國民教育。
硬撐派
苗僑偉：點會洗腦
「其實認識國家一定要，不過今次件事有政治因素。（你啲仔女都大曬，仲係讀國際學校，你自己有冇教嚇仔女？）我有灌輸俾仔女，佢哋認識中國歷史都係睇英文書。依家嘅父母咁激動，都係擔心仔女被人洗腦，國民教育嘅內容可以多啲討論。其實點會洗腦，英國政府統治咁耐都洗唔到香港人個腦啦！」
何守信：國民教育係必要
「我覺得國民教育係必要嘅。每一個國家都有自己嘅國民教育，但其中嘅內容係點？點睇歷史？同事實有冇出入？呢樣嘢就好重要嘞！我覺得家長應該冷靜啲，唔好俾政客利用。過激嘅行為都解決唔到問題，我唔認為國民教育係洗腦，香港做英國殖民地咁多年，要洗腦都洗咗好多年啦！」
楊小娟：港人唔了解至驚
「我喺大陸接受教育，之後嚟香港生活咗廿年。我唔認為國民教育有乜好擔心，只係香港人唔了解至咁驚。身為中國人，了解自己國家係應該嘅。攞咗英國護照嘅香港人，英國政府唔會因為咁當你係自己人。但香港人返中國呢，只係拎個回鄉證就可以自由出入啦！咁至係自己人吖嘛！」
關禮傑：咪一面倒反對
「小朋友讀天主教學校或者佛教學校，課程中都有宗教色彩，但唔代表出嚟嘅學生一定信！況且家庭教育亦十分重要，成長過程中，小朋友都會發展自己嘅獨立性格。大家咪一面倒反對，先去了解嚇先，認為有錯至直接指出問題，要求改正。」
反對派
鄧梓峰：荒天下之大謬
「我反對國民教育，因為暫時睇到 嘅內容，係冇空間俾學生思考及判斷，依家 嘅國民教育係要控制學生思想。其實世界各地好多地方都有國民教育，但內容只係公民教育，強調有個人嘅思考，唔係好似香港 嘅國民教育要控制學生的情緒。簡直係荒天下之大謬！」
陳美琪：驚小朋友變魔鬼
「我真係好嬲！指引話要每年評估學生嘅愛國情操，學生亦要互相評估，咁咪即係要啲細路仔互相篤背脊！呢套嘢大陸十年前已經唔用啦！要推行國民教育嗰啲人，自己仔女去曬外國，咪叫佢哋啲仔女返嚟接受國民教育先囉。啲官話試嚇之後可以改，咁我俾你食咗山埃先至醫你吖，我驚啲小朋友變成互篤背脊嘅魔鬼啫！」
曹永廉：官員信唔過
「我覺得要俾小朋友知道事實。今屆政府唔聽市民意見，一味做表面功夫。政府官員除咗林鄭月娥我係 Like，其他嘅官員就真係太多醜聞，做錯嘢就側側膊，信唔過。我都明撤回國民教育方案，政府會尷尬，不過高官收得咁高人工，就要諗雙贏嘅方法！」
莫可欣：指引有問題
「我喺瑞士讀書，對中國其實都唔係好認識。多啲認識自己國家唔係壞事，但我覺得有人推行國民教育時唔得誠實囉！要真真正正了解中國嘅過去，唔可以刻意收埋啲唔好嘅嘢，所以我覺得依家國民教育份指引內容好有問題！」
黎燕珊：唔需要強迫灌輸
「雖然我個女今年剛入大學，細仔又讀國際學校，國民教育唔影響我 嘅仔女，但我覺得唔需要特登設一個科目去教國民教育，唔需要強迫灌輸。」
陳倩揚：支持學生企出嚟
「我暫時中立，有真正 嘅教材先至可以表態。不過我支持學生企出嚟爭取 嘅態度，佢 哋勇於發表意見係好，不過就唔贊成咁激進，而政府亦要聽市民嘅聲音。」
楊思琦：擔心變得仲差
「唔贊成國民教育，其實德、智、體、群嘅教育已包括同科目裏面，根本國民教育唔需要獨立成科。如果成咗科，將來政府要轉教材，會變得仲差。我身邊好多教師朋友，全部都反對推行國民教育，政府應該聽意見。」
姚嘉妮夫婦：唔好勉強
「我哋認識中國有好多途徑，因為一個科目搞到學生返完學去集會絕食，為乜先？政府又話呢科唔計分唔使考試了，但如果唔計分，學生都唔會上堂啦，邊個會去學？根本係自相矛盾！」
撐嗰個死嗰個
反國教聲音此起彼落，支持聲音反成被攻擊目標。近日藝人及電視台只要提出支持國教的言論，都會成為箭靶。
亞視收逾萬投訴
本周一（ 3日），亞視節目《 ATV焦點》播映後，通訊事務管理局收到過萬宗投訴。該集內容指國民教育科的爭議，是有人為選舉而製造話題，更指學民思潮是被利用的棋子。後來亞視記者採訪反國民教育科大聯盟集會時，更被現場人士舉起抗議標語幹擾。
關寶慧節食撐
關寶慧在微博表示要節食支持推行國民教育，結果被網友群起圍攻。關寶慧說：「我好支持，邊個國家冇國民教育，依家回歸中國梗係要，只不過要睇內容。」
譚校長亦被插
譚詠麟近日在網上撐一名民建聯候選人，又公開表示香港一定要有國民教育，並強調需要多溝通、多共識，但仍被網民鬧爆。
姚嘉妮夫婦：唔好勉強
「我哋認識中國有好多途徑，因為一個科目搞到學生返完學去集會絕食，為乜先？政府又話呢科唔計分唔使考試了，但如果唔計分，學生都唔會上堂啦，邊個會去學？根本係自相矛盾！」
撐嗰個死嗰個
反國教聲音此起彼落，支持聲音反成被攻擊目標。近日藝人及電視台只要提出支持國教的言論，都會成為箭靶。
亞視收逾萬投訴
本周一（ 3日），亞視節目《 ATV焦點》播映後，通訊事務管理局收到過萬宗投訴。該集內容指國民教育科的爭議，是有人為選舉而製造話題，更指學民思潮是被利用的棋子。後來亞視記者採訪反國民教育科大聯盟集會時，更被現場人士舉起抗議標語幹擾。
關寶慧節食撐
關寶慧在微博表示要節食支持推行國民教育，結果被網友群起圍攻。關寶慧說：「我好支持，邊個國家冇國民教育，依家回歸中國梗係要，只不過要睇內容。」
譚校長亦被插
譚詠麟近日在網上撐一名民建聯候選人，又公開表示香港一定要有國民教育，並強調需要多溝通、多共識，但仍被網民鬧爆。
.[忽然1周]國民教育 娛圈兩派互片
http://hk8news-d.blogspot.com/2012/09/1_6278.html
