滾熱辣
絕密請帖曝光 博覽館擺酒 8千一圍 霍啟剛慳娶郭晶晶
2012年09月07日
霍啟剛和郭晶晶拍拖八年，終於修成正果，早前準奶奶朱玲玲更親口確認好快派帖。不過郭晶晶這場豪門夢並非無風無浪，有傳二人受到家族爭產風波影響，搞到婚禮要縮皮，場地由五星級君悅酒店下調至會展。
這樁喜事終落實四條一（ 11月 11日）舉行，霍家上下近日已用電郵通知賓客時間地點，更附上用一對新人童年照做封面的請帖。原來二人大婚的場地，並非外間盛傳的會展，而是山長水遠的亞洲博覽館。作為豪門盛事，霍家今次筵開 300圍，但稀世食材欠奉，一圍八千蚊成交。
平民價錢娶到國寶入門，霍啟剛認真識計數。
霍啟剛和郭晶晶擇了 11月 11日舉行大婚，為了確定賓客出席人數，男家上周陸續寄電郵俾親友，叫定他們預留時間到賀。本刊在特別途徑得到這封電子請帖。帖上一對新人大玩懷舊調皮風格，特登揀了童年時期講電話的舊相，寓意共諧連理。
酒席冇翅食
對於婚宴地點，霍家一直保密。原來一對新人上月已撲槌選址，極唔就腳，座落機場隔籬的亞洲博覽館。上周初霍啟剛就帶埋婚禮搞手團隊睇環境。知情人士說：「霍生好緊張，場地每個角落都有影低相，要求個搞手用最小嘅空間去興建舞台。」霍啟剛是霍英東後人，郭晶晶亦是全國知名嘅「跳水皇後」，大把達官貴人爭住到賀。為免得失，佢哋今次擺成 300圍，邀請近 4000名賓客。
今次喜事，霍家基金一早撥定千五萬作為籌備經費，但 300圍始終是大數目，所以霍啟剛惟有在菜單上落手，將酒席成本 cut到一圍八千蚊，價錢跟酒樓相若。知情人士說：「晶晶喺國內拍過廣告呼籲保護動物，所以一早同霍啟剛傾好菜單上唔可以有翅出現。既然係咁，霍啟剛決定一切從簡，提供基本菜式，珍饈百味欠奉，連酒水都唔使三百萬落樓。」雖然菜式一般，不過婚宴卡士強勁。據知一班奧運跳水選手如吳敏霞、何姿等已答應擔任郭晶晶姊妹，而霍郭二人亦大打人情牌，正在邀請劉翔、林丹等運動明星上台表演贈興，排場星光熠熠。
羅康瑞唔坐主家席
搞掂菜單，訂好表演嘉賓名單，當晚的座位安排亦令一對新人傷腦筋。霍啟剛父親霍震霆、朱玲玲及其現任丈夫羅康瑞，基本上冇可能坐在同一枱。知情人士說：「雖然朱玲玲改嫁，但同三粒仔嘅感情依然好好，所以霍啟剛唔知點同阿媽開口，要佢同老公當晚分開坐。」母子情深，朱玲玲當然知道阿仔諗緊乜，故主動提議安排羅康瑞坐另一枱。而朱玲玲為怕羅康瑞當晚坐到悶，安插老死葉蒨文和林子祥坐在羅身邊。
座位安排問題迎刃而解，朱玲玲呢杯新抱茶飲硬。早前本刊拍得朱玲玲現身電視城，率先派帖俾慧妍雅集一眾成員，表現風騷。而霍家亦決定下周日（ 9日）開始向各賓客派帖和餅卡。
霍家大宅搭鐵架
霍啟剛和郭晶晶四條一於博覽館完婚後，隨即飛抵北京再擺多次喜酒，方便女家身處北京的親友祝賀。婚後郭晶晶順理成章以港人身份定居香港，進駐位於沙宣道的霍家大宅。近日霍家大宅花園開始有工人搭起鐵架，準備月底在後花園舉行 cocktail party，預祝一對新人新婚快樂。
解構婚禮
選址偏僻
亞洲博覽館佔地龐大，不過地處偏僻，由住滿名人的山頂坐車去都要 40分鐘，諗起都遠。
分開枱坐
上周四（ 30日），朱玲玲帶埋老公羅康瑞出席「慧妍雅集」晚會，朱更興奮表示就快派帖。不過原來婚禮當晚，二人要分開坐。
主家席坐 36人
兩家人面廣，所以今次兩圍主家席也增至 18人一圍。鑑於身份問題，羅康瑞就被編到男方主家席隔籬。由於場地有限，所以舞台設計亦十分簡單，冇搭建伸展台。
跳水姊妹團
吳敏霞和何姿一早應承出任郭晶晶的姊妹團，但兩人相當口密，向外堅稱仲未收到通知，認真好姊妹。
莎莉幫手
朱玲玲和羅康瑞拍拖期間，已介紹老友葉蒨文（莎莉）給他認識，所以婚宴當晚就由葉陪伴羅。
平民菜單
其實二人婚宴菜單尚算得體，客人冇翅食，就用花膠取代。相信霍家因為人脈關係，可以筍價八千蚊一圍。
婚前拼搏
郭晶晶快為人妻，隨時為霍家繼後香燈，結束運動明星生涯。難怪她婚前搏到盡 𢱑銀。
百萬代言
郭晶晶婚前再為代言的護膚品牌拍攝全新廣告，更花了一個月時間，行勻全國各地區宣傳，袋走七位數。
簽勻全國
郭晶晶不停穿州過省出席簽名活動，每場酬勞接近十萬。不過錢唔易搵，早前她到合肥簽名時就俾過百群眾圍，簽到扁嘴。
超豪婚宴
豪門辦喜事，一味要誇，樣樣最靚、最 top，單計婚禮使費，分分鐘買到層豪宅。難怪霍啟剛和郭晶晶這樁婚事冇得比。
蔡加怡
今年 8月，玩具大王蔡志明孻女蔡加怡嫁設計師陳漢驄。當日婚紗、禮服均出自名設計師，加上超豪布置兼酒水，貴氣十足！
場地︰會展舊翼
圍數︰ 80
使費︰ 600萬
鄭志雯
今年 3月，鄭裕彤孫女鄭志雯，與已故鋼鐵大王龐鼎元孫兒龐建貽結婚。婚宴選用非一般的菜單，除了有新翁龐熙珍藏的 30頭吉品乾鮑，酒單中更包括全球未開售的 2004 Pol Roger Brut香檳，夠曬浮誇！
場地︰會展新翼
圍數︰ 200
使費︰ 1100萬
.[忽然1周]絕密請帖曝光 博覽館擺酒 8千一圍 霍啟剛慳娶郭晶晶
http://hk8news-d.blogspot.com/2012/09/1-8.html
