黎諾懿終極目標開牧場 朱璿講對白頻頻「爆粗」
黎諾懿終極目標開牧場
十年前，香港多了一位黎諾懿，事緣原名「黎日昇」的他加入電視圈時，料不到填了個藝名就當真名用，不過這個寓意一生平穩的名字非常適合他，閒來亦可秘撈做農夫，享受田園生活，他又表示不排除跟隨老友鄭伊健一樣做老襯，與「富貴女友」李潔瑩閃婚。
黎諾懿全名筆畫多過五十畫，以為他被父母大整蠱，年少時罰抄全名必定嘗盡苦頭，豈料他自爆入行十年，無人知道其真名，他說：「當時仲係叫『黎日昇』嘅我考入藝員訓練班填資料，見到有一欄『藝名』，咁我就填咗師傅幫我改嘅勁揪嘅名『諾懿』做藝名，點知我第一日返工拎住張藝員證，就諗咦……點解我叫『黎諾懿』嘅？真名去咗邊？問番藝員科，佢哋話無o架喇，我心諗，死喇！」
屋後有塊田
唔改都改咗，惟有順勢變做「黎諾懿」，他笑言雖然名字難寫，不過寓意平平穩穩，非常適合秘撈做農夫的自己：「我人生嘅終極目標係有個牧場，養嚇馬，養嚇羊，幾寫意！不過我依家都係農夫嚟o架！屋企後面有塊田，平時會落手落腳種嚇菜，仲養緊兩隻狗，嘩！愈講愈正！」
黎諾懿沒料到簡單一次填個藝名，就叫到現在。 
黎諾懿讚女友幫得手 ，十足賢內助。
不排除閃婚
雖然黎諾懿樂於過安穩生活，但對於愛情，他竟然不排除與「富貴女友」李潔瑩玩閃婚：「佢真係一個好好嘅女朋友，平時都係佢幫我安排所有瑣碎事，真係好感謝佢！」咦！諾懿和鄭伊健老友鬼鬼，伊健預告即將做老襯，即使諾懿婚期未定，相信他們亦會為雙方的婚禮做兄弟，力抗姐妹團！
朱璿講對白頻頻「爆粗」
前華姐冠軍朱璿當選不久，即提名金像獎「最佳新演員」！曾因廣東話不純正，講對白時不慎「爆粗」的她希望惡補廣東話，做個「成熟藝員」！
於2008年奪得華姐冠軍後，朱璿即於2010年提名香港電影金像獎「最佳新演員」！雖然她現時的人氣遜於初出道時，不過她並無氣餒，揚言要向成熟演員之路邁進：「當時可以提名『最佳新演員』獎，真係多謝大家對我喺電影上嘅肯定！依家我希望可以重新做一樣嘢畀大家認可，例如做多啲唔同性格嘅角色畀觀眾睇，向住成熟嘅演員路前進。」
雖然朱璿在演戲上早已備受肯定，不過她認為廣東話仍是其一大死穴，更笑言有時因講對白咬字不正而似爆粗，令她大感尷尬：「我希望講好啲對白，因為我開工成日唔小心講咗粗口！其實我本身唔知o架，仲講得好認真，不過好多人聽完我講對白就笑到攣埋一舊，我先至知自己講咗粗口！」做演員需要有自信，不過朱璿卻坦言因不時「賽後檢討」，有時難免會質疑自己：「作為演員，唔係廿四小時都自信，我有時有好強嘅自信，有時又會變到好弱，開始唔相信自己！」
代入角色磨練
不過她經過完一輪反思後，還是會重返現實，活在當下！朱璿對演戲上的執著，即使在放鬆時亦會表現出來：「有時睇電影或者睇書，我都成日幻想如果我係其中一個角色，我會點樣去演。」
.黎諾懿終極目標開牧場 朱璇講對白頻頻「爆粗」
http://veryy8.blogspot.com/2013/01/blog-post_4739.html.黎諾懿終極目標開牧場 朱璇講對白頻頻「爆粗」
http://veryy8.blogspot.com/2013/01/blog-post_4739.html
