2013年1月11日星期五

亞視炒人內幕　唔遊行列黑名單

2013年01月11日

前排有圈中麻雀腳通水俾媽咪姐知，原來王征炒人係早有「黑名單」。話說上年 11月無出席亞視遊行嘅，都會榜上有名！當中車車（張紫櫻）、戚黛黛同張啟樂，咁啱就係無去，又咁啱就係俾王征炒嘅第一批亞視藝員，你都咪話無根據。

講開又講，由「星光幫」入行簽約亞視嘅李志豪比其他人好彩少少，有免炒金牌，原因係佢張合約無包要上「演藝訓練班」，所以就算唔返洗腦班都無俾人炒。之不過亞視見佢唔肯上堂，私自推咗李志豪好幾個騷，大導演陳木勝想搵佢拍嚇電影，亞視都要斷人米路推鬼埋呀！唔通王征想一打 300，藝員、主持都要自己做埋先開心？

被炒嘅人當中，媽咪姐對阿 Ben張啟樂算有啲印象，佢拍劇做主持真係唔錯，又無咩行差踏錯，連佢自己都唔明點解會俾人炒！

前排亞視竟然主動同 9月先約滿嘅「星光幫」李志豪傾轉經理人約，咁樣咪變相連藝人最基本嘅底薪都慳埋？