娛頭
失聲暴瘦抑鬱 林欣彤厭食症
2012年12月20日現年 22歲的林欣彤（ Mag），前年贏得《超級巨聲 2》冠軍後，挾著小巨肺外號得到無綫力捧，去年二月簽約英皇娛樂，處女碟得白金成績，橫掃各個樂壇頒獎禮的新人獎，風頭一時無兩。
成名背負沉重壓力，上位中的林欣彤，今年中突患抑鬱症，事業停頓。有指她因失聲引爆抑鬱外，另一導火線是視她如搖錢樹的無綫太急進，阿 Mag做到無停手；加上與羅孝勇的戀情被打壓，又因被容祖兒排擠，屈屈埋埋，結果抑鬱厭食。
有指近月已停工的她病情不單未見起色，且因厭食及焦慮症趨嚴重，體重在短短個多月內，由 114磅暴跌至 84磅，肥妹仔變火柴人。為保命，林欣彤將缺席年底所有樂壇頒獎禮，全面停工養病。
入行一年後，她只清減少許，直至今年因工作不勝負荷，捱唔住的她，患上焦慮厭食，身形逐步縮水，十一月出席 Eric Kwok婚禮時，面容憔悴。
摸黑出動
出道兩年，林欣彤憑鄰家女孩形象加上特別聲線，很快為觀眾接受，無綫更視為吸金生力軍。
要靠把聲搵食，林欣彤今年中開始喉嚨生繭，接著失聲，九月與同公司的容祖兒演出新城音樂會後，原本安排好密集式工作的她，忽然失蹤兩個月。最近一次露面，是十一月底出席音樂人 Eric Kwok（郭偉亮）的婚禮，其時她已因患上厭食，臉色異常蒼白。
據悉，林欣彤過去個多月來食慾不振，即使在身邊人苦勸下努力逼自己進食，但轉頭亦會全部自動吐出，體重更因此在這短短時間內暴跌三十磅。
因為抑鬱導致失眠，食唔到瞓唔落，昔日調皮的小女生，變得精神恍惚，情緒不穩，經常失控狂哭。
受病情影響，林欣彤開始怕見人，連覆診攞藥，都要等夜晚才出動，生活如行屍走肉。
一班巨聲幫的戰友，也曾親歷林欣彤哭訴，主要是承受不了事業帶來的壓力。
「阿 Mag身體本來就差，呢兩年又不停咁做無休息。佢份人好有原則，只係鍾意唱歌，唔鍾意拍戲，但公司一定要佢拍。阿 Mag覺得現實同理想有好大距離，成日呻好大壓力。發病後，佢成日匿埋喺屋企，好彩仲肯睇醫生，有時都會半夜出動，去沙田搵舊同學傾偈。」知情者說。
今年中，聲帶出事後，林欣彤仍死頂，為七月推出的唱片《 Love is light》錄音，但抑鬱症日趨嚴重，最後連新碟宣傳都無法應付，要停工養病。
「隻碟八月尾出咗，宣傳都做唔到，公司知佢啲抑鬱症愈來愈犀利，批咗三個月假俾佢，諗住等頒獎禮前嗰個月先再嚟過。其實佢聲帶九月尾已經好番曬，但抑鬱症冇改善仲差咗，十月尾仲有埋厭食同焦慮症，連公司嘅人佢都唔願意接觸。阿 Mag亦知道唔可以拖，最後同公司講一個頒獎禮都唔去，希望專心休養，明年二月先復工。」林欣彤身邊好友透露。
以大欺小
外界以為林欣彤因失聲打擊引致情緒病，但在巨聲星幫中一早知道，與容祖兒合作電影《 Diva華麗之後》被排擠，為林欣彤情緒波動，種下禍根。
「入咗英皇半年就出碟，就算市道差都賣得唔錯，上年又係咁掃獎，無綫同英皇見阿 Mag個勢好，食住上乜都 sell佢先，開戲又預埋佢。《 Diva華麗之後》阿 Mag雖然係第二女主角，但戲份其實同容祖兒差不多，角色又搶。袓兒梗係詐型，之後同阿 Mag開工都無兩句。開鏡嗰日，記者叫合照，祖兒都唔想，叫咗幾次先勉強拉埋其他人一齊影。」
反面玩嘢
除了受容祖兒冷待外，亦有傳林欣彤因為拒絕他人追求，對方反面玩嘢，令閱世未深的她無法招架。
「佢拍緊《 Diva》同時，仲有部《起勢搖滾》趕緊，仲要應付無綫大小演出，點可能唔吃力。最弊就係《起勢搖滾》個導演 Jacky追佢，阿 Mag唔吼，跟住就俾人針對，經常要佢一場戲做好多次，但冇人敢出聲，唔開心又大壓力，加埋錄新碟撞正聲帶出問題，仲有公司又唔准佢同羅孝勇（ Sheldon）公開，壓力爆煲，結果搞到抑鬱囉。」身邊好友說。
林欣彤：仲睇緊醫生
記者守候多日，上週三（十二月十二日）晚上九時半，終於見到戴上口罩的林欣彤外出，坐上的士後，戒心甚重的她不時向後望。據了解，她本來約了醫生見面攞藥，後因發現被跟，才改行程到沙田曉翠山莊，而她的好友亦一早在屋苑外等她。穿短褲及白色襪褲的林欣彤因急瘦三十磅，雙腿比過往纖幼得多，對於抑鬱病轉趨嚴重，她氣若浮絲說：「有心，我仲睇緊醫生，休養緊。（瘦咗三十磅？）少少啦！（唔會出席任何樂壇頒獎禮？）未知，會同公司商量先再安排（有指你情緒低落另一原因，係俾祖兒排擠？）唔好意思……（你係咪厭食？）冇。」之後她與友人入閘上樓。
直到淩晨一時多，離開時發現記者仍在守候，林欣彤刻意走去買消夜，到大圍買了糖水甜品，再去買點心、炒粉外賣，之後吃力地抽住幾大袋返家。
羅孝勇：我好支持佢
本週一（十七日），本刊記者向緋聞男友羅孝勇了解有關林欣彤的病情，他先與對方劃清界線。
「我哋只係朋友，其實成班巨聲幫都好支持佢，大家都好關心佢，我哋可以做嘅事唔多。（ Mag厭食瘦咗三十磅？）可能係食得健康咗，休息時間多咗，做多咗運動啦！」
物極必反
追逐名利，藝人不知不覺跌入壓力陷阱，步向抑鬱，甚至患上厭食。幾經辛苦走過陰霾，保命可以，但能重新振作的成功例子卻不多。
韓君婷厭食停經
當年韓君婷以龍躉肥臀見稱，曾經減肥成功，身材有波有籮，可惜 06年疑減肥過度，抑鬱以致脫髮停經，暴瘦變火柴人。她幾經診治，始判定患上厭食症，家人要求她返新加坡醫病，近年已甚少現身公開場合。
鄭秀文身心癱瘓
09年接拍電影《長恨歌》， Sammi引爆抑鬱，當時她為角色的「纖瘦」形象進行地獄式減肥，十日減十磅，絕食演變成厭食，身心拖垮，拒跟外界溝通。幸得家人照顧及信仰的支持，休養超過一年，重新洗牌，終於戰勝抑鬱。
薛凱琪想自殺
08年患上抑鬱， 09年拍電影《人間喜劇》病情加深，暴瘦至 85磅，當時她每天都有尋死念頭，試過紅酒送安眠藥求死不果。得好友方大同及圈外朋友力勸求醫對症下藥，並在信仰中改變負面思維，醫治一年，薛凱琪終重拾笑容。
袁潔瑩淡出娛樂圈
15歲出道，一直順風順水，直至 90年代由少女轉走成熟路線，以及加入樂壇做歌手，壓力愈來愈大，更因減肥過度而患上厭食症，本來已經唔夠一百磅的她，一度跌至 77磅得棚骨，被迫退出娛樂圈全面養病。近年搞中醫美容院，精神體重亦回復正常。
.[壹週刊]失聲暴瘦抑鬱 林欣彤厭食症
http://veryy8.blogspot.com/2012/12/blog-post_586.html.[壹週刊]失聲暴瘦抑鬱 林欣彤厭食症
http://veryy8.blogspot.com/2012/12/blog-post_586.html
