2012年9月8日星期六

陳爽Let Me Free跳出娛樂圈轉行嫁人

陳爽Let Me Free跳出娛樂圈轉行嫁人

陳爽在娛樂圈苦拚三年多，去年決定投身「打工仔」行列，在事業線上重新起跑，換回自由人生；今年，她決定於年底與拍拖一年多的男友拉埋天窗，步入人生另一個階段！陳爽掌握命運，無悔作出兩個重要決定，誓要為人生寫下璀璨新一頁！

城電自去年發動挖角攻勢，令無綫台前幕後出現逃亡潮，不過去年離開無綫的前華姐季軍陳爽，卻非轉投王維基旗下，反而選擇由藝人轉做航空公司銷售經理！轉行至今有一年多，回想最初，曾經歷掙紮期：「畢業之後入咗TVB，試咗好多嘢，例如拍廣告、主持、拍劇等，覺得呢方面可以Manage到，所以想挑戰嚇自己，一路以嚟想試嚇Office嘅工。嗰時轉工都猶豫咗好耐，問咗好多人例如曾志偉、樂易玲小姐嘅意見，佢哋都覺得如果真係想做，都可以趁後生去試一試！」

要踏實：唔發明星夢

在演藝圈這麼多姿多采的地方，竟然有人願意放棄璀璨星途、甘於淡泊做「打工仔」，這未免太難以置信吧？不過陳爽絕非一個愛發明星夢的人，更認為踏實才是王道：「做藝員有好多嘢都控制唔到，有時真係要睇運氣或者撞唔撞得啱角色，真係有好多機緣巧合！而做航空公司真係可以踏踏實實、一步一步嚟，人生嘅遠景真係可以睇到！」

來自哈爾濱的陳爽選美後，隻身來港發展，當藝人最深的體驗，莫過於是「自由的代價」！她說：「做咗三年幾藝人，每年新年都喺公司嗰邊過，好多時星期六、日都要去拍嘢或者練跳舞，所以依家嘅自由空間真係大好多！星期六、日真係可以去飲茶、睇戲！今年我去咗好多地方，之前做藝人一年只可以去一次旅行，不過由我返咗航空公司份工到依家已經去過三、四次！」

轉工換來自由的同時，陳爽在愛情路上也一樣順利，今年4月，金融才俊男友Anthony Leung在法國求婚！提起這個浪漫勝地，她浮現出一幕幕甜入心扉的畫面：「記得嗰日佢孭住個好重嘅背囊帶住我去玩，當時我哋由朝早玩到夜晚，佢都仲未有一個好機會向我求婚，後來夜晚去到酒店，佢終於等到好時機！不過，佢同我講番一直都想買紮玫瑰花畀我，不過因為我成日都黐住佢，所以搞到佢冇機會買，後來佢象徵式買咗一支玫瑰花畀我，然後就向我求婚，但我都覺得好浪漫！」

要結婚：搵啱Mr. Right

每次提起男友，陳爽甜絲絲地讚不絕口：「我不嬲拍拖都以結婚為目標，佢係我一直要搵嘅人！佢係香港人，係劍橋嘅博士，讀書好叻，又係一個好善良、孝順嘅人！佢大我三歲，好似一個哥哥咁諗嘢、好成熟，又會帶住我，所以我覺得佢係個好值得依靠嘅人，同佢一齊我覺得好放心！」

能夠找到付託終身的另一半，對於很多女仔來說是夢寐以求的事，加上能趕及30歲前出嫁，更是夫復何求！今年29歲的陳爽成功上岸，將於年底結婚，問到是否及時脫離「剩女」行列？她笑說：「時間上我冇畀自己期限，最緊要係遇到啱嘅人，依家真係好好，龍年又結到婚，我哋雙方父母好開心！」完婚後，話題便會轉到生仔，不過對於是獨生女的她而言，她希望生兩個小朋友，以彌補未能陪伴父母的遺憾：「我媽咪成日都同我講快啲生小朋友，會對身體好啲！不過我自己就未急住，不過都有計劃生兩個，因為我係獨生女，以前出外讀書，成日都唔喺父母身邊，覺得好對唔住佢哋。如果有兩個小朋友，咁陪伴屋企人方面就會好啲！」

後記：Chok甫最滿足！

陳爽天生一副明星相，雖然現已轉行，不過身形依然Keep得很Fit，拍照時，一舉手、一投足，動作自然！她笑著承認：「頭先攝影師哥哥同我影相真係好開心！可能我好鍾意自我表現，喺鎂光燈嗰一刻真係好滿足！」

陳爽轉行後，更能享受自由的樂趣！

待嫁新娘陳爽，零舍容光煥發！