2012年9月8日星期六

網友爆張馨予做過坐枱

2012年09月07日

張馨予同吳卓羲分手後，為咗向前男友證明活得比你好，早前就同李晨拖手曬恩愛。不過呢段「晨馨戀」就唔多受人祝福，網友喺微博喪插張馨予博出位，搞到佢要啟用「停止評論」功能。

一波未平，一波又起。有位網友周一（ 3日）就喺微博踢爆張馨予出道前做過夜總會坐枱小姐，仲寫上夜總會名同價錢，講到言之鑿鑿。其實之前一早傳過張馨予做舞小姐，張當然否認，仲話呢啲傳聞好「荒唐」。既然呢類傳聞五時三刻就有一單，媽咪姐認為張馨予要再努力啲洗底喇！

張馨予周六（ 1日）大方拖住新歡李晨，出席王菲同李亞鵬嘅嫣然基金活動。話曬呢個係慈善活動，拖仔搶鏡呢招又真係唔啱使嘅！

呢個網友踢爆張馨予出道前分別喺兩間夜總會做過，仲話佢陪坐價係三千蚊一晚。近年張嘅五官成日變，如果傳聞係真，媽咪姐真係想知當時佢係咩樣，收得咁貴。