媽咪姐
周星馳於文鳳 分手總要分埋錢
2012年09月07日
好多時，一對情侶分咗手，先係連串糾纏嘅開始。同居嘅，可以爭傢俬爭雪櫃再爭埋隻貓；無同居嘅，可以瀟灑少少，但少不免都係要計錢！好似於文鳳啱啱就入稟高等法院，向分手兩年嘅前愛人周星馳追討 7千萬投資傭金，兩個人話唔定好快就要喺法庭見。
講開又講，於文鳳其實幾旺星爺，佢 97年開始做「星女友」之後，兼任埋私人投資顧問， 13年間不斷投資股票物業，好似發展尖沙嘴 gi商場同山頂「天比高」項目等，粗略估計幫星爺賺近 10億！最近就有報道話由星爺出任執行董事嘅上市公司比高集團（ 8220），呢兩年蝕咗 2億幾，唔少業務大計嘅進度又未如理想。咦，唔通真係無於文鳳睇住就差咁啲？
不過，當一個想嫁一個唔想娶，目標咁唔一致，呢段關係都係算罷啦！或者 40歲嘅於小姐都啱，既然留唔住個人，就不如留多啲錢傍身做 facial。做女人，有時真係唔到我哋唔實際㗎！
.[忽然1周]周星馳於文鳳 分手總要分埋錢
http://hk8news-d.blogspot.com/2012/09/1_2082.html
