2013年3月27日 星期三

TVB急召叛將救亡 林家棟誓不回巢

※林家棟覺得TVB生活枯燥無味,日以繼夜的地獄生涯實在難耐。


TVB急召叛將救亡 林家棟誓不回巢

      

近年TVB小生興起北上搵食,留守打仗就買少見少,冇曬小生,退而求其次,只好向有號召力嘅中佬招手,例如梁家輝、張兆輝和吳啟華都一網打盡。據知,近年在電影界愈撈愈掂的林家棟亦俾TVB睇中,更用度身訂造劇本來利誘他回巢,但家棟竟請TVB食檸檬,諗都唔諗,問都唔問就推,他語帶堅定說:「我幫佢唔到,亦冇資格幫佢!」

採訪:方騫平 Make-up & Hair:Jessica Yuen@Oasis Studio  場地:彌敦酒店

以前TVB惡曬,叛將被列入黑名單,永不錄用。但時勢不同,外出搵食渠道太多,大台都唔可以再聲大大,仲要低聲下氣說服舊將回歸。現年45歲的家棟,兩年前首次監製的低成本電影《打擂台》,連金像獎「最佳電影」都拎過,仲三度提名角逐《香港電影金像獎》「最佳男配角」,絕對唔係二打六!入行24年,曾是無綫一線小生,套套劇收視過40點,更創下連續四年擔正台慶劇的威水史。可惜厭倦枯燥無味,日以繼夜的地獄生涯,令他難以忍受,所以12年前拍完《酒是故鄉醇》後,就算前途未蔔,都決心離開!打後獲劉德華提攜,而杜琪峯的江湖片也預他一份。時至今日,雖然TVB高層做過說客,但他堅持不吃回頭草。

家棟自爆:「舊年佢哋搵過我,但我冇細問就推咗啦!(娘家好需要幫手喎?)我睇唔到喎!坦白講,佢哋係大機構,佢哋有咁多人,一年出咗咁多小生,我冇資格幫。其實佢哋培育多啲小生好過(搵外援),最緊要搵有氣質、有火嘅藝人,唔一定齋睇樣,否則只係花瓶一個。好似黃智雯好有潛質;梁烈唯道火就嘭嘭聲,應該好有heart!咁多年嚟,TVB出太多俊男同美女,但電視係入屋,要同觀眾拉近距離咁先係真正嘅主角,好似夏雨、(燦哥)廖偉雄咁,我自問當日都係蛋散,冇其他人咁靚仔,可以入到屋有機會做到主角。」

唔希罕TVB嘅平台,家棟有大把出路,他寧可選擇成為寰亞旗下藝人,期待有更大發圍!他笑說:「我貪心㗎!如果神燈畀我三個願望,我希望將來可以做埋導演、編劇同埋男主角,喺每個崗位都做到成績,咁樣有生之年,對自己都有所交代呀。」對於憑《寒戰》角逐最佳男配角,家棟謙虛說:「(信心)一半半啦!我本身睇好《懸紅》嘅萬梓良,佢戴咗大眼仔好出色!不過,鄭中基早前獲頒金馬獎最佳男配角都被睇高一線嘅!」



※林家棟覺得TVB生活枯燥無味,日以繼夜的地獄生涯實在難耐。

※林家棟貼本屆《香港電影金像獎》結果:影帝:梁家輝《寒戰》

※林家棟貼本屆《香港電影金像獎》結果:影後:周迅《大魔術師》

※林家棟貼本屆《香港電影金像獎》結果:最佳男配角: 鄭中基《低俗喜劇》

※林家棟認為《懸紅》嘅萬梓良十分出色。



.TVB急召叛將救亡 林家棟誓不回巢
http://veryy8.blogspot.com/2013/03/tvb-tvb_27.html
.TVB急召叛將救亡 林家棟誓不回巢
http://veryy8.blogspot.com/2013/03/tvb-tvb_27.html