2013年3月27日 星期三

[FACE 305 本地娛樂] 舊朋友 徹底斬甩吳浩康 莊思敏:冇可能復合




真面目

舊朋友 徹底斬甩吳浩康 莊思敏:冇可能復合

拿督女莊思敏( Jacquelin) 06年失驚無神戀上三線歌手吳浩康,嚇親好多人。

雖然屋企個衣帽間仲大過男友全家住嘅 700呎麗港城單位,兩人都係戀足 5年至因為性格不合而告分手收場。分手就快兩年,上週突然俾記者撞破雙雙翻兜同遊觀塘 apm。原來兩人重聚只因要搞清分手後事, Jacquelin一句:「已經冇曬 feel!」 Deep都係專心湊𡃁模啦!

自己有架紅色 Benz跑, Jacquelin當日就坐自選車牌保母車,阿 Deep係前度,所以離開時自己搭地鐵。

分手後話冇再聯絡,莊思敏兩年來傳過富二代林忠豪同白健恩兩段煲水緋聞,吳浩康就頻溝𡃁模,最近仲有傳他重本追內地女星白冰,睇落兩人緣盡,卻被記者發現原來約埋重聚。

保持單身既 Jacquelin就段段緋聞都得個傳字,其中包括廖碧兒舊愛,及最近捲入賣淫醜聞的港男白健恩。《忽然 1周》圖片

去年被拍到與𡃁模 Hazel當街扯煙, Deep才承認情侶關係,年頭再自爆單身,最近被傳力𠝹強國女星白冰(小圖)。

搞埋後事

上週四( 21日),記者發現莊思敏獨自一人在觀塘 apm遊走,再到電訊鋪頭等人,原來約咗分手兩年前男友吳浩康。

熱戀時期人前恩愛,今次重聚 Jacquelin同 Deep雖然面露笑容氣氛融洽,不過就極力保持距離,喺電訊公司辦完事就各行各路。記者致電 Jacquelin兩人是否復合, Jacquelin則大反應話:「我哋分手後真係冇聯絡,係最近至傾番偈做番朋友咋。但係已經冇曬 feel,一定唔會復合囉!嗰日去數碼通係轉個戶口名啫。佢個電話號碼係大家拍拖時我幫佢開,合約到期大家約埋去轉個名囉! Deep好有風度,揀觀塘都係就我嗰日做嘢咋!」搞掂埋呢單,大家各行各路囉!

愈行愈遠

兩年前開始隆胸、割雙眼皮,最近又抽埋下巴脂肪,本來做緊醫學美容代言人嘅 Jacquelin就快自己做老闆娘,開化妝學校。《忽然 1周》圖片

Deep發展高不成低不就,主力工作就係拍經理人公司英皇有份投資電影,去年夾 band組成 Closer亦冇乜回響,反觀 Jacquelin,分手後桃花多、工作多,唔只做醫學美容代言人,今年自己都玩埋一份開化妝學校:「係同一個化妝師、一個髮型師朋友夾份開,投資七位數字,裝修得七七八八,計劃五月開幕啦。我唔只負責宣傳,到時仲會教埋 catwalk同形象,又要請人做埋行政工作呢,所以真係冇乜時間拍拖住!」

撰文:娛樂組

攝影:攝影組


.[FACE 305 本地娛樂] 舊朋友 徹底斬甩吳浩康 莊思敏:冇可能復合
http://veryy8.blogspot.com/2013/03/face-305-face_8529.html
.[FACE 305 本地娛樂] 舊朋友 徹底斬甩吳浩康 莊思敏:冇可能復合
http://veryy8.blogspot.com/2013/03/face-305-face_8529.html