2013年3月27日 星期三

[FACE 305 本地娛樂] 年中娶熊黛林  47歲郭富城床頭擺簫求子




封面

年中娶熊黛林  47歲郭富城床頭擺簫求子

熊黛林( Lynn)跟郭富城( Aaron),自 06年因拍 MV一吻定情,相戀 7年,雖然 Lynn熱愛「攻城」宣示主權,可惜「天王嫂」地位一直未站穩陣腳,近期更有報道指城城難敵 7年之癢,偷搭 TVB女神苟芸慧,更稱二人秘交 5個月似層層。

雖然面對苟芸慧威脅,但身為「正印」的 Lynn未驚過,兩度現身 Aaron演唱會,大膽高調踩場,據知原來 47歲熟男 Aaron恨生仔,早打算於年中擇日迎娶女友,甚至搵定風水佬求追仔秘技,結婚生仔早有準備,難怪熊黛林咁風騷。

城城開騷,除了於台上高呼「 I love you」外,週日( 24日)更在萬多名觀眾面前,跟女友世紀握手,做到咁出,結婚啦!微博圖片

郭富城上年 10月與 33歲熊黛林去馬爾代夫度假,睇落兩人感情穩定之際,突然又爆出 Aaron同新一代女神苟芸慧,因拍 MV廣告而秘交 5個月,天王配女神,無論高度或外形都相近,但 Lynn跟郭富城拍拖 7年,正所謂有乜風浪未見過, Lynn除了連睇兩場男友演唱會,以行動證身份外,又淡定代男友答話:「佢(郭富城)唔介意就得,處理到就冇問題,他工作有時控制唔到,唔好嘅事要黐你都冇辦法,呢啲唔係隻眼開隻眼閉,而係互相尊重。」大婆宣言一出,搞到曾嘲同城城傳緋聞係「爛桃花」的苟芸慧亦急急道歉「 say sorry」。

開光風水簫

郭富城去年曾獨自上門搵風水師求生仔秘方,據知城城一心來年生馬仔,亦準備年中迎娶熊黛林入門,風水師更教他床頭放一支經過唸經加持的開光簫,便可一索得男。

求子多秘方

據玄學家吳佩孚表示,其實除了床頭擺簫外,坊間亦有很多求子方法,如麒麟要放床頭二側,或卧室放大葉。

週一( 25日)吳佩孚說:「 2004至 2023年都行緊八運,想添丁就喺東北方擺長明燈,一定要紅色或紫色燈先有效。」

連睇兩場

我老當益壯!設計對白

郭富城一連 9場演唱會,分別 3場有女支持, 47歲郭富城果然仲有魅力喎!

18/3拖阿媽

上週一( 18日)傳出肥苟介入戀情,熊黛林即晚帶埋阿媽入場睇男友演唱會。《蘋果日報》圖片

24/3坐頭排

至週日( 24日),熊黛林再同經理人 Kim和公關好友鄭紹康一齊入場再欣賞城城,仲要坐第一行等住握手。

19/3肥苟踩場

上週一( 18日)有雜誌報道郭富城搭上苟芸慧,上週二( 19日)肥苟即同樂易玲踩入紅館睇郭富城演唱會,明知係煲水,有宣傳位當然唔好嘥。《蘋果日報》圖片

郭富城係正宗馬癡,更係三班馬「愛的呼喚」馬主,難怪連生仔都要追個馬仔。《蘋果日報》圖片

恨生馬仔

據知今次 Lynn對緋聞鬆容不迫,全因 Aaron早已與她有結婚打算,據二人的密友透露:「近排 Lynn搬嘉亨灣都係唔想睹物思人,諗起過身的老豆啫,根本佢同阿王(郭富城)關係根本不知幾好,其實阿王眼見四大天王中,淨得自己未結婚,加上自己都快 5字頭,佢都有打算成家立室。 Lynn梗係恨嫁啦,本來佢哋都準備呢 2年結婚,阿王都開始心急想要 BB,之前有聽過佢講話想今年拉埋天窗,仲搵咗個城中出名的風水師睇過,不過 Lynn爸爸年頭過身,睇嚟都要等過一排先!」

唔好惹咪冇事囉!真實對白

面對苟芸慧威脅, Lynn超淡定話:「我寧願揀第 1行,因為可以握手。」似乎知城城會世紀一握。又話「唔好嘅嘢要黐過嚟都冇辦法。」寸到苟芸慧死死吓。

我喺度 say sorry!真實對白

無端被指搭上郭富城,苟芸慧曾以「爛桃花」形容緋聞,上週六( 23日)苟芸慧公開道歉說:「我喺度 say sorry,可能我中文唔好用錯字,所以決定唔再回應,以免講多錯多連累大家。」

名風水師指點

被郭富城睇得上眼嘅當然屬城中著名風水師,據知該風水師曾擔任 TVB風水節目主持,並喺油尖旺區開鋪睇風水,知情人士續說:「郭生上年係搵過佢擇吉日結婚,城城唔想生蛇 B,所以叫個師傅幫佢喺 13年擇吉日結婚,順便睇吓家居布置,問師傅點先旺添丁,師傅就教佢買支普通嘅簫,攞嚟開光後,擺喺床頭就 ok,不過就一定係結婚後先 work!」 Aaron唔只做馬主,仲要做「馬」爸,睇嚟 Lynn今次真係可以名正言順做天王嫂啦!

肥苟改黐徐子淇富貴老友

雖然冇城城照顧,但最近熱衷潛水的苟芸慧,忽然跟身家超過 5億的徐子淇好友、超級炒樓王鄭躬明老婆陳君宜十分老友,上週六( 23日)苟芸慧更由陳君宜司機接載她到喇沙書院遊泳池見面。陳君宜說:「 1年前我喺活動識佢,有次聽朋友講開佢想學潛水,咪捉埋佢去一齊學囉,不過個課程學兩堂就完,遲啲都會約埋一齊試吓潛水。」

陳君宜

跟陳君宜見面前,苟姑娘則約埋𡃁妹李綺雯一齊開餐,據知苟芸慧一直識潛水,但跟陳君宜只是學了兩日。

肥苟食死貓

苟芸慧於西環高街的寓所布滿車房,有車房職員說:「幾貴嘅車都係泊街,咁有人睇住嘅!」

上週一有雜誌稱郭富城名下波子 911 GT3跑車,泊於苟芸慧樓下載女神去遊車河,但查實肥苟的西環寓所附近全是車房,不少名貴跑車皆會泊於附近,而車房職員亦說:「郭富城就未見過,佢哋通常會叫助手揸過嚟,呢度周街都係靚車,唔出奇吖!」

體貼男友

雖然 Aaron一直未有正式畀 Lynn一個名分,但 7年來 Aaron都對 Lynn寵愛有加,雖然物質上只係送過架 50萬 Benz氹女友,但七年來都算經過唔少風雨。

尋名醫

11年時因持續頭痛而入院做身體檢查,有報道指結果發現 Lynn腦內有腫瘤,當時 Aaron為她四出搜尋名醫。《蘋果日報》圖片

反小美

去年 10月, Lynn趁自己生日高調到 Aaron屋企慶祝,事後被小美暗寸「垃圾」, Aaron即解畫話唔係指 Lynn。《蘋果日報》圖片

急奔喪

1月時 Lynn父親病逝, Aaron以「未來女婿」身份奔喪,穿素服親送熊父最後一程。《蘋果日報》圖片

採訪、撰文、攝影:娛樂組


.[FACE 305 本地娛樂] 年中娶熊黛林  47歲郭富城床頭擺簫求子
http://veryy8.blogspot.com/2013/03/face-305-47-face.html
.[FACE 305 本地娛樂] 年中娶熊黛林  47歲郭富城床頭擺簫求子
http://veryy8.blogspot.com/2013/03/face-305-47-face.html