一窩蜂
這星期全城最hit話題一定係smart phone個新app《LINE》，無論你係iPhone定係Android機都例牌要裝。
只因《LINE》最特別有個「SHAKE」功能去識新朋友，免費又有新嘢玩，難怪《LINE》好似病毒咁迅速擴散。
可惜《LINE》潮興咗唔夠兩日，忽傳此app會將手機內嘅資料外洩及會收SMS費用，嚇到班潮星要迅速delete，亦有用家小儀狠批《LINE》：「又煩又嘥電」！一日定生死，香港人真係趕時間。
楊千嬅原本亦係《LINE》用家，不過自從在微博傳出《LINE》疑似有問題後，便已立即delete。
小儀：好煩，好嘥電
星期五嗰日因為好多group chat，搞到我電話啲電由90幾%得番嗰20%，加上個list度成日彈啲陌生人出嚟，所以最後都係決定delete。
森美：等吓先啦
呢幾日好多friend叫我download，過一排先決定下唔下載啦！家用緊《WhatsApp》覺得好好。
糖妹：我download唔到
我仲用緊3G咋，唔知係咪唔支援，所以download唔到。
Donald：冇delete到
因為我冇set到「Public」及ID冇用自己名，自己都有班friend用緊，加上啲貼紙咁得意，我會《WhatsApp》同《LINE》一齊用。
莊思敏：擔心就不如唔玩
我試過有陌生人send嘢畀我，如果ok都可以傾幾句，呢度睇唔到電話號碼，我當微博咁玩，如果擔心就不如唔玩。
鍾一憲：有百幾人add我
我16號生日，淩晨已經有百幾人add我同我講生日快樂，因為《LINE》check到位置，嗰日更有人走嚟我生日party同我講生日快樂。
田蕊妮：驚收錢delete咗
講真用得網絡都預咗冇私隱，我e-mail都試過俾人入侵，加上我未用慣呢個apps，所以用番《WhatsApp》熟啲好過。
《LINE》旋風5日
13/10（四）宣傳始動開始喺SMS及網絡上有訊息叫人下載《LINE》。14/10（五）熱潮爆發網絡上瘋傳下載《LINE》及上載個人QR code籲朋友加入名單裏，裝《LINE》潮爆發。15/10（六）傳聞四起出現叫人uninstall的傳聞，內容指經電訊公司及電視新聞證實《LINE》洩密及收費傳聞，同日《WhatsApp》推出限時免費還擊。16/10（日）迅速卸Line傳聞開始在SMS、《WhatsApp》及facebook內瘋傳，裝《LINE》潮變成卸《LINE》潮，app民亦人心惶惶。17/10（一）急發聲明由於謠傳滿天飛，故連《LINE》的日本發行商亦急急發聲明話《LINE》不會濫收費用和私隱有保證，不過聲明講咗，信唔信就由大家決定。
玩LINE有機洩密？
潮app《LINE》hit得快，但瞬間就被人話內藏收費陷阱兼個人資料容易被盜，本刊問過相關專家，發現玩LINE私隱係冇乜保障。
疑團一
發訊息收本地通訊錢？本地通訊app《Talkbox》負責人Jacqueline話SMS收錢唔合理:「以我地嘅做法寫咗free SMS（《LINE》產品簡介都有咁寫）就代表唔會涉及電訊商收費，只靠internet傳輸數據。即時通訊app優勢就係跳過電訊商，濫收SMS咁易查到，咁做唔合理。」而PCCW回應話：「目前無任何證據顯示客戶使用該應用程式作聊天時，會觸發任何短訊或短訊收費，只會產生數據使用量。」
疑團二
個人資料被盜？防毒軟件F-Secure目前仲分析緊LINE程式，但亞洲區Security Advisor Goh Su Gim就話app偷資料理論上可能：「曾經有木馬app可以睇到你SMS記錄同輸入過咩密碼。用Andriod機喺不明來歷嘅地方下載app風險更大，不過蘋果App Store審批一向嚴格，有木馬機會不大。至於點解會add到唔識嘅朋友，估計係靠搜尋電話簿上朋友嘅朋友，如果唔想俾陌生人搵到可以喺設定入面關閉〈Set ID to Public〉功能。」
《LINE》有乜好玩？
《LINE》是一款日本推出嘅免費apps，因為能互發訊息、語音通話、文字表情等功能，所以被稱為是一款集成《WhatsApp》、《Viber》、《Skype》等的軟件，免費又咁多嘢玩，難怪可以一夜大熱！ ####
驚到delete咗！真實對白
14日起，兩日內《LINE》嘅下載量已超過一百萬次，喺App store更衝破長期榜首嘅《WhatsApp》，搞到原本收$0.99美金嘅《WhatsApp》都要限時免費搶用家。
100人群聊 《WhatsApp》內嘅群組聊天最多只支援10人聊天，而《LINE》則提升至上限100人聊天，一人一句都傾到天光。
可愛表情 聊天室裏，內置大量自家的表情圖案，圖像比emoji更生鬼有趣，更加吸引用家選用。
QR code add友 除咗用電話簿內嘅朋友或個人帳號增加朋友外，更可以用QR code搵friends，方法係自己影張相做code，或者用reader對準朋友個二維碼讀出後嚟add，方便好多。
SHAKE新朋友 除咗用左邊嗰三種方法搵舊朋友外，更加入「SHAKE」嘅功能，用家只需搖一搖手機，更可自動搜尋附近同樣有此apps嘅陌生人，跟佢互傳訊息。
230期《FACE 週刊》
