2011年10月19日 星期三

[FACE.直接睇]肇慶執40萬 ¥8,888 1分鐘 徐子珊Laughing快閃吸人仔




搵快錢

憑《潛行狙擊》人氣急升嘅徐子珊同謝天華,近日成爆騷王頻頻賺唔停,就算TVB要二人行孖咇出騷喊高價,一樣咁搶手。

上週六(15日),子珊同謝天華出席肇慶一樓盤銷售晚宴娛賓,二人站台唔夠45分鐘,輕鬆執走40萬人仔。計起來每分鐘合收¥8888,貴過陳豪同陳茵媺情侶騷喎。



《潛》劇平均收視達31點,成為2011年最高收視劇集,亦帶挈四位主角成廣告客戶搶手貨,不過陳法拉同黃宗澤近日因忙拍劇,TVB索性將徐子珊同謝天華搭檔出騷賺外快,更有內地地產商不惜豪擲40萬「人仔」邀請二人到肇慶登台。

升足1倍

上週六(15日)晚,子珊同謝天華為樓盤銷售晚宴擔任表演嘉賓,兩個人分別上台唱兩首歌及負責抽獎,全程不足45分鐘,40萬人仔(約48萬8千港紙)袋袋平安,誇張過陳豪同陳茵媺情侶檔出騷最高價收30萬﹗據知二人近日酬金已大躍進,之前二人返內地接騷分別收開約十多萬,家就企硬廿萬,不過子珊就唔肯透露加咗幾多:「(酬金)係有提升咗,(加)五成就太誇張。實際加咗幾多就唔方便透露……」咁唔使拍劇咁辛苦啦。

出騷三級制

TVB藝員走埠登台,除咗因應級數唔同而身價各異外,如果客戶想有額外要求,亦要逐樣收費。第1級 唱歌最平TVB一線阿哥阿姐登台,唱歌最平盛惠約10萬唱兩首歌,如薛家燕等阿姐級數則要收30萬包三首歌。第2級 跳舞加碼能歌善舞嘅TVB藝員唔多,但如果客戶要求藝員唱歌兼跳埋舞,則要額外加5萬。第3級 陪食最貴一般情況,藝員出外登台都會早去早回,但假如客戶想藝員陪老闆食飯,或另有安排而令藝員要在當地留宿,則要再多畀10萬,即係最平廿萬埋單。 ####



子珊向賓客打招呼時,即被熱情粉絲十幾對擒拿手捉實,嚇到子珊即刻想縮手。



在內地被稱「拉風哥」(即Laughing哥)嘅謝天華,當晚做壓軸表演,一出場就被粉絲讚到面紅紅,唔知以為佢飲咗酒。



子珊一出場,全場嘉賓衝曬上前做「伸手黨」,人叠人情況洶湧,連舞台邊嘅花盆都踩爛曬(小圖)。





抽埋獎

子珊唱完〈愛如潮水〉和〈Hit Me〉之後,就負責做抽獎嘉賓及與老闆合照,輕輕鬆鬆袋走廿萬。



雲頂激啲

今月8日徐子珊同謝天華到大馬雲頂演出,二人大跳貼身舞;至於今次肇慶登台冇交流,天華就話:「咁每次活動性質都有唔同嘅!」



早年經常走埠搵錢嘅馬浚偉話過,在美加登台十幾天嘅收入,足夠佢畀一層單位嘅首期。


230期《FACE 週刊》