大躍進
一套《真相》令撈咗17年嘅陳展鵬翻生，氣勢即時唔同，台慶劇《法證先鋒III》雖然戲分只屬配角仔，但每次宣傳都例牌企正中間，搞到第二男主角吳卓羲好冇癮。
咁風騷，只因珍姐曾勵珍錫到燶，剛拍完嘅《ATF反恐》戲分更多過吳卓羲。據知今年「飛躍進步男藝員」一獎已篤定係佢，有人撐又等攞獎，陳展鵬今鋪彈到上天啦！
34歲陳展鵬，90年代尾做過歌手又撈過亞視，08年由亞視回歸TVB，捱咗咁耐，今年終憑《真相》內飾演斯文靚仔律師上位。深得珍姐賞識嘅佢，今年台慶亮燈亦企喺頭行，同黎耀祥、林峯等並列。下年更有《回到三國》、《ATF反恐》、《真相2》和《神探哥倫布》4劇等住上，開劇密過契仔林峯。
大茄排頭陣
力捧有樣睇，陳展鵬喺上週首播嘅台慶劇《法證先鋒III》，戲分雖只係得約6集，於劇中飾演心理醫生，同第一女主角張可頤有少少感情戲。但只分別喺第5集及17集至20集等出現。不過每次《法》劇宣傳，陳展鵬都被安排企喺中間位，同男主角黎耀祥看齊，據知此舉就辣㷫吳卓羲。兩人唔妥早有先兆，早前煞科的《ATF反恐》，煎pang戲分亦反壓羲哥，據知下月台慶「飛躍進步男藝員」都屬意煎pang擸埋。有傳陳展鵬私下更怨吳卓羲超怕死，劇組人員透露：「《反恐》好多動作戲，陳展鵬成日都親自上陣，反而阿Ron就好錫身，煎pang就成日話阿Ron得個樣，仲話有人成日遲到添！」人後寸爆，不過捱過嘅陳展鵬對記者則收曬氣燄，他說：「我拍戲不嬲冇諗幾多戲分，但今次喺《法證》係比想像中多，力捧嘅感覺唔係好強烈，以前廿幾歲就話好在意，家只係想有角色畀我、我拍好，就係咁簡單！」浸咗咁多年，唔係白浸嘅！
《法證》紅茄
《法》劇30集，以單元劇case發展，有唔少二綫星都喺得兩至三集戲分，第一個單元就有演同性戀者的黎諾懿，之後就有高海寧、湯盈盈、唐詩詠和樂瞳等。個個都係寸星，宅男記住實喇！
高海寧做情婦
高Ling做鄧英敏情婦，戲分極少，亦欠性感場面，同佢孭飛嘅飲食節目冇得比。
樂瞳自閉女
樂瞳飾演有自閉症和精神病患者「天眼少女」，會被李國麟利用做搖錢樹。
湯盈盈戀元華
湯盈盈被元華寸爆鍾意黎耀祥，可惜湯盈盈原來睇中嘅係做黎老豆嘅元華。
唐詩詠女殺手
唐詩詠喺尾段出場，除有爭產戲分外，亦會殺死周家蔚。唐詩詠殺人？冇乜說服力喎。 ####
人紅做咩都醒神啲，前週日（9日）陳展鵬到尖沙咀Paul Smith買銀包，其間更model上身，無嗱嗱拉開件衫騷吓結實胸膛，勁有巨星味！
陳展鵬貴為珍姐愛將，台慶亮燈當日又喺靚位，梗係要同恩師珍姐碰杯，祝吓酒啦！
早前台慶亮燈，《法》劇一眾藝員坐定定訪間，大茄嘅陳展鵬仲坐喺中間，拍住一姐張可頤，反而吳卓羲（左）就坐埋一邊。
不嬲冇諗有幾多戲分！真實對白
陳展鵬雖然喺新劇《ATF反恐》鍊贏吳卓羲，不過佢話：「喺《反恐》我哋好有交流、好有默契。」官腔咗啲喎！
陳展鵬喺《法》戲分得6集戲，出場幾乎仲少過隔籬嘅蕭正楠，不過得寵程度就爭好遠喇！
掃貴貨陳展鵬當日心情靚絕，戰利品唔少，喺I.T逗留接近兩個鐘，恤衫、褸、太陽鏡樣樣有，搵得到，怕咩使。
羲哥話融洽新劇《ATF反恐》，陳展鵬、吳卓羲飾演兄弟，不過戲分就以陳展鵬重好多，吳卓羲只係做第二男主角，仲要俾陳展鵬寸佢怕死用替身。但卓羲就話：「我同展鵬好融洽，大家唔好太多猜測。」
230期《FACE 週刊》
