媽咪姐手帳
容祖兒最近首新歌〈花千樹〉，媽咪姐真係覺得幾好聽，不過一聽落去就似曾相識咁唔知邊處聽過。點知首歌派咗上電台幾日咋，即刻俾高登仔踢爆，話祖兒首歌〈花千樹〉係抄94年馬浚偉嘅〈不再悲觀〉，尤其副歌部分真係似到十足十。英皇一姐之前已經俾人話又抄MV、又抄衫，依家連歌都抄？
其實〈花〉嘅作曲人係兩個鬼佬Mattew Tisher同Andrew Ang，而馬仔首歌就係張宇作曲，張宇仲唱埋國語版〈情有獨鍾〉。雖然抄歌之謎真相大白，但高登仔好有心將三首歌串埋一齊放上youtube。對於抄歌一事，祖兒喺上周六（13日）嘅廣州演唱會後解釋：「呢首歌唔係香港人寫，係從外國公司收歌返嚟，所以我冇諗到抄襲嘅問題，其他人嘅反應我會接受，呢件事咪當另一種宣傳。」
咁都得？媽咪姐俾四個字你——「掩耳盜鈴」呀！ ####
愈多人話我抄歌愈着數！（設計對白）
雖然被指抄歌，不過冇影響祖兒喺廣州演唱會嘅演出，佢仲大唱出事歌曲〈花千樹〉，觀眾大讚唱得超好聽。
網友為證明祖兒抄歌，喺論壇羅列曬〈花千樹〉、〈不再悲觀〉、〈情有獨鍾〉嘅video，仲寫咗句「七國咁亂，一家團聚」，明窒祖兒。
容祖兒〈花千樹〉
張宇〈情有獨鍾〉
馬浚偉〈不再悲觀〉
後來網友索性串埋3首歌剪輯成一個MV，至今大約二千多人睇過，咁又慳番一筆宣傳費。
838期
