2011年10月15日 星期六

[忽然一周.直接睇]長毛袁彌明藐爆 67歲白韻琴騎呢選舉騷




娛一叮

去年白韻琴(原名白韻琹)以66歲高齡參選五區公投,其間數度與同選區的「社民連」黃毓民隔空開火,最後她敗給死敵。

事隔一年,白姐姐捲土重來參加11月6日灣仔區議會選舉,狙擊社民連成員。今次參選,她講明並非為錢,「睇唔過眼啲人成日掟蕉,與其喺屋企做宅女,不如選區議員。」

白姐姐心中團火猶在,但就遭社民連「搞事分子」長毛梁國雄狂踩:「平時唔知佢噏乜,希望啲選民明啦!」而向來與社民連關係密切的袁彌明亦暗寸白姐姐:「佢係老啲,不過都祝佢好運嘅!」



連日來,本刊直擊身穿自家製黃青色情侶裝的白姐姐和老公謝偉俊(Paul),在灣仔鬧市拉票情況。周二(11日)早上,白姐姐以一貫嬌嗲聲音說:「我最鍾意就係綠色,個人睇落活力啲嘛!」雖然她悉心妝扮,但途經嘅街坊似乎唔多受落,有些擰轉面揞住嘴笑。

借上牀寸對手

白姐姐和阿Paul在街邊擺好「架步」後,即分頭向街坊力sell,白姐姐以高八度聲音重複說:「Hello,你好!」談到對手麥國風,白姐姐即發揮才女本色,以牀技比喻對手說:「啲人話佢好溫和,佢要拉票就梗係溫和啦!等於啲男人女人上牀,咁梗係口甜舌滑乜都話得啦,上完牀咪變臉做暴君囉。上次我選五區公投,佢哋(社民連)搵人喺彌敦道圍我,打我小人,爭一吋就打到我啦!今次我參選目的要狙擊佢哋。」今次她代表灣仔樂活區,狙擊社民連成員麥國風。

長毛:佢講嘢語無倫次

選舉仍屬初哥,不過一把年紀的白姐姐與阿Paul,事事親力親為,為拉票踎低又擒高,她更呻今次選舉經費只得五萬元,沒閒錢請義工,連飯也幾乎忘記食。「上次選立法會,五個禮拜使咗150萬,請義工派傳單都幾十萬啦!不過嗰啲人烚下烚下,唔請好過請。今次唔夠錢,只請幾個兼職,其他嘢要自己同阿Paul一腳踢。」

對於白姐姐公開宣戰,本刊問過其同區對手麥國風,他表示未驚過:「佢都冇地區工作經驗,齋靠名人我唔會驚佢囉!」至於一向激進的長毛梁國雄和社民連主席陶君行,更插她講嘢唔經大腦,長毛說:「我都唔知佢噏乜!佢有佢言論自由,但講嘢全無根據九唔搭八,但我祝福佢,希望選民知佢講乜嘢。」陶則說:「佢咁騎呢,知名度唔代表支持度囉!我相信大家會搵正經人!」至於與社民連關係密切的落選港姐袁彌明亦說:「佢係老啲,不過我都尊重佢,祝佢好運嘅!」本刊亦曾致電前「社民連」成員黃毓民,但至截稿前仍未有回覆。

拉票行程

白姐姐以67歲高齡選區議員,成敗與否仍是未知之數,但起碼誠意可嘉。單是周二(11日)就連踩8個鐘,又企街又淋雨,難怪拉票過後,面無血色的白姐姐要上車唞一唞。 ####



下午四時,謝偉俊開着「六嬸」方逸華多年前轉贈的保時捷跑車,與着上七彩花點襪的白姐姐巡區插旗嗌口號,希望集夫婦二人之力打低社民連。



危站馬路

周二(11日),白姐姐早上九時已落區拉票,更冒險走出馬路狂揮手,但人人趕着開車上班,幾乎冇人願意停低say hi。



擔擔抬抬

有公職在身的謝偉俊,每天上班前及放工後也會為白姐姐助選。由於選舉經費只得五萬,粗重功夫全落在阿Paul身上。



近十五分鐘白姐姐落力向途人派傳單,可惜睇嘅人多,接嘅人少,但她依然笑口噬噬與途人傾偈,唔怕面懵。



自我宣傳

周一(10日),身穿青BB戰衣的白姐姐,現身皮草活動,但她象徵式着了皮草3分鐘便除下,繼續以戰衣示人博宣傳。其他賓客如米雪等都當佢透明。





白姐姐的區選宣傳單張,打正旗號是希望擊倒社民連為目標,政綱包括反對外傭居留權及改善交通問題等。



長毛:唔知佢噏乜!(真實對白)



陶君行:佢騎呢!(真實對白)



袁彌明:佢係老啲,祝佢好運!(真實對白)



7:30am 齋隊果汁

自言無時間與無胃口食飯的白姐姐, 未拉票前,只喝一杯果汁頂肚。



9:00am 自己插旗

無錢請義工,白姐姐與阿Paul只好自己落手插旗拉票。



3:00pm 波子遊街

白姐姐坐着六嬸送贈的戰車,於金鐘至銅鑼灣一帶巡遊,沿途揮手。



5:00pm 攰到要唞唞

由朝到晚踩足8粒鐘,叫到聲沙,白姐姐攰到坐在車上閉目養神。


846期