陳智燊賣花「欣」緣 朱千雪肥妹冇人追

陳智燊賣花「欣」緣 霎時感動

無綫小生陳智燊（Jason）生得靚仔有型，今年更備受力捧擔正做男主角，相信上位機會應該不遠。Jason更表示鍾嘉欣憶起二人入行初期拍劇往事，令他大為感動！

無綫「筍盤」陳豪被私有化後，相信一眾女士們都懷著失落的心情，不過「筍盤」又點可能只得一個咁少？無綫新進小生陳智燊擁有俊朗外表，外國留學兼講得一口流利英語，實屬港女的理想對象。現今正值無綫鬧花旦小生荒，今年Jason獲得無綫力捧，首次在《幸福摩天倫》擔正做男主角，飾演富有愛心的社工，經常幫忙身邊同事。

首次擔正做男主角的陳智燊，多謝無綫給予機會。



陳智燊現階段事業為重，不想拍拖。

開拍前心情緊張

Jason在開拍前非常緊張，他說：「我其實係臨開劇前一兩日先開始緊張，好驚自己應付唔嚟，驚自己拍得唔好。不過當大部分時間都投入拍攝嗰陣，就唔會諗咁多嘢！」

講到拍劇趣事，陳智燊坦言今次與鍾嘉欣合作甚有默契，某次與鍾嘉欣閒聊二人初入行時合作拍劇的點滴，令他大為感動，他說：「嗰陣我讀藝員訓練班，同佢合作過拍劇。嗰時套劇我只係做一個買花嘅人，而佢就係賣花畀我嘅人，嗰場戲都只係短短1、2分鐘。佢講嗰陣，我仲要諗咗好耐先至記得，不過真係好感動隔咗咁耐，佢都仲記得。」

感謝無綫多機會

不過講到感動，Jason坦言今年多謝公司給予的機會，他說：「今年自己有兩套劇出，本身又有主持工作，真係好多謝公司。（會唔會搵番個女朋友分享開心事？）唔會啦，如果第時多啲劇拍一定忙到拖都冇時間拍，我都係專心事業。」

朱千雪慨嘆 肥妹冇人追

外國長大的應屆港姐季軍朱千雪，過往在溫哥華過的都是白色聖誕，天氣寒冷白雪飄飄，朱千雪指每年聖誕節的指定動作是與兩個妹妹玩大富翁及打邊爐，認真中西合璧！她說：「因為每年聖誕，加拿大都已經落緊大雪，所以都好少出街，唔知點解每年嘅聖誕都會一年一次玩大富翁，我哋屋企仲會趁嗰日打邊爐慶祝。」

以往在溫哥華過著白色聖誕的朱千雪，聖誕例必打邊爐慶祝。

佳節樂享天倫

加拿大的聖誕節著重家庭相聚，問朱千雪有沒有男仔在這浪漫氣氛下追求她，朱千雪笑說：「冇呀，嗰時咁肥，邊有人追！其實嗰邊嘅聖誕節都係同屋企人過，大家食嚇嘢，傾嚇偈共享天倫。」朱千雪參選港姐期間進行「地獄式減肥」瘦了兩個碼，現時苗條得多，她說：「減肥後最享受係著衫驚件衫太大，以前就好多One Size嘅衫都著唔落，依家都保持跑步、遊水，靠做運動減磅。」

擔任《勁歌金曲》主持的朱千雪（右）自言還未懂像崔建邦（右三）般搞氣氛，惟有做好本分熟讀稿件。



朱千雪在選港姐期間地獄式減肥，瘦了兩個碼令她信心大增。

靜待真命天子

雖然現時相當省鏡，但朱千雪笑言一樣冇人追：「可能人大咗比較難識朋友，自己又少出去玩，所以更加難識到男仔，不過唔心急嘅，慢慢等一個心地好，又搞笑嘅男仔出現啦。」選美入行後朱千雪發展也頗順利，擔任《勁歌金曲》主持竟然好少NG，表現備受讚賞，她說：「自己一收到稿就即刻背到熟曬，自己搞氣氛經驗唔夠，惟有做好最基本嘅嘢，同埋有崔建邦喺度都定好多！」

.陳智燊賣花「欣」緣 朱千雪肥妹冇人追
http://veryy8.blogspot.com/2012/12/blog-post_6942.html.陳智燊賣花「欣」緣 朱千雪肥妹冇人追
http://veryy8.blogspot.com/2012/12/blog-post_6942.html